سەرچاوەیەک بۆ ئاڤا: بە سەدان سەربازی سوپای سووریا هاتوونەتە نێو خاکی عێراق

ئاڤا نیوز

 

سەرچاوەیەک لە سوپای عێراق بۆ ئاڤا ئاشکرایکردووە، بە سەدان سەربازی هەڵاتووی سوپای سووریا هاتوونەتە سنووری عێراق لە دەروازەی قائیم و دەیانەوێت بپەڕنەوە نێو خاکی عێراق، حکومەتی عێراقیش ڕەزامەندیی داوە بپەڕنەوە.

 

وێنە گەورەکە: سوپای سووریا لە پاشەکشێکردن بەرامبەر بە گرووپە چەکدارەکانی ئۆپۆزیسیۆنی وڵاتەکە بەردەوامە و تا ئێستا چەندین شاری گەورەی سووریا کەوتوونەتە ژێر کۆنترۆلی گرووپە چەکدارەکان، ئەمەش کاریگەریی کردووەتە سەر ورەی سەربازانی سوپای سووریا و بەشێکیان لە ڕیزەکانی سوپا دەکشێنەوە و وڵاتەکە جێبهێڵن.

 

لێدوانی فەرمی: سەرچاوەیەکی سەربازیی عێراق کە نەیویست ناوی ئاشکرا بکرێت، بە ئاڤا میدیای ڕاگەیاند: حکومەت ڕەزامەندیی داوە ئەو سەرباز و ئەفسەرانەی سووریا کە دەپەڕنەوە خاکی عێراق وەریان بگرێت کە تاکو ئێستا نزیکەی دوو هەزار سەرباز و ئەفسەری پلەی جۆراوجۆر بە چەک و ئۆتۆمبێلەکانیان خۆیان ڕادەستی هێزەکانی پاراستنی سنوور کردووە.

 

سەرچاوەکە ئاماژەی بەوەش کرد: ئەو سەربازانە هەر کاتێک بیانەوێت دەگەڕێنرێنەوە بۆ سووریا و ئێستا بەغدا و دیمەشق لەسەر هێڵن  کە لە چەند کاتژمێری داهاتوودا ئەو سەرباز و ئەفسەرانە بە فڕۆکەی تایبەت بۆ دیمەشقی پایتەختی سووریا دەگوازرێنەوە.

 

لە لایەکی دیکەوە: سەرچاوەیەک لە ژووری ئۆپەراسیۆنە هاوبەشەکانی عێراق بۆ ئاڤا گوتی: ژمارەیەک سەرباز و ئەفسەری سوپای سووریا بە برینداری گەیشتوونەتە خاڵی سنووری و  ئێستا لە نەخۆشخانەی قائیمن بۆ وەرگرتنی چارەسەری پزیشکی.