لە غەززە چی دەگوزەرێت؟

ئاڤا نیوز 

 

هەوڵەكان بۆ ئاگربەست بەردەوامن، بۆ ئەو مەبەستە شاندێكی ئیسرائیل لە قەتەرە، ئەمریكا دەیەوێت پێش ڕەمەزان ئاگربەست بكرێت، نەتەوە یەكگرتووەكان هۆشداری لە شەڕ دەدات و سەرۆکوەزیرانی ئیسرائیلیش دەڵێت پلانێكی تۆكمەیان بۆ هاوكاری خەڵك هەیە لە غەززە.  

 

هێرشی ڕەفەح و کارەساتی مرۆیی

 

 ئیسرائیل بەنیازە لە ماوەی چەند ڕۆژی داهاتوودا هێرشەكانی بۆ سەر ناوچەی ڕەفەح دەستپێبكات نەتەوەیەكگرتووەكان هۆشداری دەدات و دەڵێت، ئەمە كارەساتێكی گەورە دروستدەكات، لەلایەكی دیكەشەوە هەوڵەكان بۆ گەیشتن بە ئاگربەست لە كەرتی غەززە بەردەوامە، بەڵام تا ئێستا هیچ هەنگاوێكی كرداری لەم بوارەدا نەنراوە. 

بنیامین نەتانیاهۆ، سەرۆکوەزیرانی ئیسرائیل دەڵێت، لە دوو هەفتەی داهاتوودا ئەگەری هەیە هێرش بكەنە سەر ناوچەی ڕەفەح، هەروەها ئاماژەی بەوەکردووە، هەنگاوێكی گرنگ و جدییان گرتووەتە بەر بۆ گەیاندنی هاوكاری بە هاووڵاتییان لە كەرتی غەززە، لەلایەكی دیكەشەوە ئەمریكا هەموو هەوڵەكانی خستوەتەگەڕ بۆ ئەوەی پێش ڕەمەزان ئاگربەست لە كەرتی غەززە ڕابگەیەنرێت، بەڵام هێشتا هیچ  هەواڵێكی رژدیان نەبووە بۆ ئەم پرسە.  

 

ژمارەكان وادەڵێن

 

یەك ملیۆن و 400 هەزار كەس لە ناوچەی رەفەح ئاوارەن و پێویستیان بەهاوكاری هەیە. 

نزیكەی 30 هەزار كەس لە كەرتەكە كوژراون زۆربەیان منداڵ و ژنن. 

لە كەرتی غەززە 576 سەربازی ئیسرائیل كوژراون. 

زیاتر لە 70 هەزار كەس لە كەرتی غەززە بریندابوون.

 ئابووریی ئیسرائیل بەهۆی شەڕەكەوە 1.5 ملیار دۆلار زیانی بەرکەوتووە.

 

ئەوەی پێشبینیکراوە

 

پێشبنی دەكرێت تا سەرەتای مانگی ڕەمەزان ئیسرائیل و گرووپە چەكدارەكان ئاگربەستێكی كاتی بكەن، ئەمریكا هەوڵەكانی چڕ كردووەتەوە، لە قەتەر چەندین شاندی ئیسرائیل و حەماس كۆبوونەتەوە، نەتەوە یەكگرتووەكان پێشوازی لە هەر رێككەوتن و ئاگربەستێک دەكات كە لەناوچەكە بكرێت.