چوار سەرۆکایەتییەکەی عێراق  و لایەنەکانی دیکە لەبارەی گۆڕانکارییەکانی سووریا کۆدەبنەوە

ئاڤا نیوز

 

بڕیارە ئەمشەو چوار سەرۆکایەتییەکەی عێراق و سەرکردەی بەشێک لە لایەنە سیاسییەکان لەبەغدا کۆببنەوە و لەبارەی گۆڕانی دەسەڵات لە سووریا دوایین هەڵوێستی فەرمی و گشتگیریی عێراق ڕابگەیەنن.

 

وێنە گەورەکە: دوای تێپەڕبوونی نیو سەدە لە حکومڕانی بنەماڵەی ئەسەد و 13 ساڵ بەسەر خۆپیشاندانەکانی سووریادا، بەرەبەیانی ڕۆژی یەکشەممە 8-12-2024، چەکدارانی ئۆپۆزیسیۆنی ئەو وڵاتە، دیمەشی پایتەختیان کۆنترۆڵکرد و بەشار ئەسەد، سەرۆکی هەڵاتووی سووریاش بەرەو شوێنێکی نادیار هەڵهات.

 

زانیاریی بەدەستهاتوو: بەگوێرەی زانیارییەکانی ئاڤا، کۆبوونەوەکە لە کۆشکی سەرۆکایەتی کۆمار بەڕێودەچێت و لەتیف ڕەشید، سەرۆککۆماری عێراق میواداریی هەریەکە لە محەممەد شیاع سوودانی، سەرۆکوەزیرانی عێراق و مەحموود مەشهەدانی، سەرۆکی پەرلەمانی عێراق و فایەق زێدان، سەرۆکی ئەنجوومەنی باڵای دادوەریی دەکات. هاوکات سەرکردەی بەشێک لە لایەنەکانی ناو هاوپەیمانی ئیدارەی دەوڵەتیش تێیدا بەشدار دەبن.

 

ئەوەی پێشبینی دەکرێت: کۆبوونەوەکە تایبەتکراوە بە تاوتوێکردنی دۆخی سووریا دوای ڕووخانی دەسەڵاتەکەی بەشار ئەسەد و چۆنیەتی مامەڵەکردنی عێراق لەگەڵ گۆڕانکارییە خێراکانی ئەو وڵاتەدا، هاوکات بابەتی ئاسایشی سنوورەکان و گرنگی یەکهەڵوێستی حکومەت و لایەنەکانیش لەسەر بابەتەکانی ئێستا و داهاتووی سووریا گفتوگۆیان لەسەر دەکرێت.