بەشار ئەسەد و ئەندامانی خێزانەکەی گەیشتنە ڕووسیا

ئاڤا نیوز

 

کۆشکی سەرۆکایەتیی ڕووسیا (کرملین) گەیشتنی بەشار ئەسەد و ئەندامانی خێزانەکەی بۆ مۆسکۆی پایتەختی ڕووسیا ڕادەگەیێنێت، هاوکات داوای کۆبوونەوەی خێرای ئەنجوومەنی ئاسایشی نێودەوڵەتی لەبارەی دۆخی سووریا دەکات.

 

وێنە گەورەكە: ڕۆژی یەکشەممە 08-12-2024، هێزەكانی ئۆپۆزسیۆنی سووریا گەیشتنە دیمەشقی پایتەختی ئەو وڵاتە و كەوتنی دەسەڵاتی بەشار ئەسەدیان ڕاگەیاند، بەڵام هیچ شتێک لەبارەی چارەنووسی ئەسەد و خێزانەکەوەیە دیار نەبوو.

 

زانیاریی بەدەستهاتوو: سەرچاوەیەک لە کۆشکی سەرۆکایەتیی ڕووسیا (کرملین) ئەوەی بە ئاژانسەکانی هەواڵی ڕووسیایان ڕاگەیاندووە، بەشار ئەسەد و ئەندامانی خێزانەکەی گەیشتوونەتە مۆسکۆ و مافی پەنابەرییان لەسەر بنەمای ڕەچاوکردنی مرۆیی پێدراوە.

 

زانیاریی زیاتر: باس لەوە دەکرێت بەشار ئەسەد و  ئەندامانی خێزانەکەی لە ئیماراتەوە بەرەو ڕووسیا ڕۆیشتوون.

 

ئەمەش بزانە: نێردەی ڕووسیا لە نەتەوەیەکگرتووەکان داوای کۆبوونەوەیەکی خێرای ئەنجوومەنی ئاسایشی نێودەوڵەتی لەبارەی دۆخی سووریا بۆ ڕۆژی دووشەممە دەکات.

 

لە گۆشەیەکی دیکە: دیمیتری پۆلیانسکی، جێگری یەکەمی نێردەی ڕووسیا لە نەتەوە یەکگرتووەکان جەختی لەوە کردەوە کە نێردەی ڕووسیا لە نەتەوە یەکگرتووەکان لە نزیکەوە چاودێریی بارودۆخی سووریا دەکات و پرسیاری زۆری سەبارەت بە ڕووداوەکانی ئێستا هەیە و ڕوونیشیکردەوە کە مۆسکۆ لە ماوەی داهاتوودا بەدوای وەڵامدا دەگەڕێت سەبارەت بەو ڕووداوانە.