ئەمریکا 75 بنکەی داعشی لە سووریا بۆردوومانکرد

ئاڤا نیوز

 

دوای ڕووخانی بەشار ئەسەد لە سووریا بۆ یەکەمجار ئەمریکا بە چڕی چەندین بنکەی داعشی لە سووریا بۆردوومانکرد.

 

ڕاگەیێنراوی فەرمی: سوپای ئەمریکا ڕایگەیاند، فڕۆکە جەنگییەکانی ئەمریکا ڕۆژی یەکشەممە زیاتر لە 75 ئامانجی دەوڵەتی ئیسلامییان لە سووریا بۆردوومانکردووە و لە سەرکردە و ئۆپەراتیڤ و کەمپەکانی ئەو گرووپەیان داوە.

 

لەلایەکی دیکەوە: سێنتکۆم لە بەیاننامەیەکدا ڕایگەیاندووە، "هێرشە ئاسمانییە وردەکان" لەلایەن فڕۆکە جۆراوجۆرەکانەوە ئەنجامدراون، لەوانە فڕۆکەی بۆمبڕێژکراوی بی 52، فڕۆکەی جەنگی ئێف 15 و فڕۆکەی ئەی 10.

 

هاوکات، فەرماندەیی ناوەندیی ئەمریکا (سێنتکۆم)، ئەو هەڵمەتانە "بە مەبەستی ڕێگریکردنە لە ئەنجامدانی ئۆپەراسیۆنی دەرەکی ئەو ڕێکخراوە تیرۆریستییە و دڵنیابوون لەوەی کە هەوڵی سود وەرگرتن لە دۆخی ئێستا نادات، بۆ ئەوەی خۆی لە ناوەڕاستی سوریا دابڕێژێتەوە".

 

زیانە سەرەکییەکان: بەگوێرەی بەیاننامەکە، هەڵمەتەکان کەمپەکان و ئەندامانی ئەو ڕێکخراوە تیرۆریستییەیان لە ناوەڕاستی سووریا کردووەتە ئامانج و ئاماژەیان بەوە کردووە کە هەڵسەنگاندن بۆ ئەنجامی هەڵمەتەکان هێشتا بەردەوامە و "هیچ ئاماژەیەک نییە بۆ هیچ زیانێکی گیانی هاوڵاتی مەدەنی".