ڕۆژێک دوای ڕووخانی ئەسەد، سوورییەکان لە دیمەشق بەردەوامن لە ئاهەنگگێڕان

ئاڤا نیوز

 

بەرەبەیانی ڕۆژی دووشەممە سوورییەکان بەدڵخۆشییەوە ڕوویان لە گۆڕەپانی ئومەویدی دیمەشق کرد بۆ ئاهەنگگێڕان بەبۆنەی ڕووخانی بەشار ئەسەد، دوای ئەوەی قەدەغەی هاتووچۆی شەوانە لەلایەن گرووپە چەکدارەکانەوە هەڵگیرا.

 

چی ڕوویدا: ڕۆژی یەکشەممە، هێزە چەکدارەکان ڕووخاندنی بەشار ئەسەد و دەستپێکردنی سەردەمێکی نوێیان بۆ سوریا ڕاگەیاند، دوای ئەوەی هێزەکانیان لە بەیانی ڕۆژی یەکشەممەدا چوونە ناو دیمەشق دوای هێرشێکی خێرا کە کۆتایی بە دەسەڵاتی بنەماڵەی ئەسەد هێنا.

 

ئەمەش بزانە: هەر ئەو کاتە ژمارەیەک چەکداری ئۆپۆزیسیۆن لە گۆڕەپانی ئومەوی کۆبوونەوە، بەیانیش سوورییەکان هاتنە پاڵیان کە بە ئۆتۆمبێلەکانیان هاتبوون بۆ دەربڕینی خۆشی خۆیان.

 

لێدوانی فەرمی: ڕیم ڕەمەزان (49 ساڵ)، کە لە وەزارەتی دارایی کار دەکات، لە گۆڕەپانی ئومەویەوە قسە دەکات دەڵێت: هەستەکەمان وەسف کراو نییە، چونکە هەرگیز بە خەیاڵماندا نەدەهات ڕۆژێک لەو کابوسە ڕزگارمان بێت، چونکە ئازاری زۆرمان چەشتووە ئێمە 55 ساڵە لە وتنی وشەیەکیش دەترسین، تەنانەت لە ماڵەوەش دەنگمان دادەبەزێنین، دەڵێین دیوارەکان گوێیان هەیە.

 

لەلایەکی دیکەوە: عەبدول مونەعیم نەقلی (40 ساڵ) دەڵێت: هیچ ترسێک نییە، سوپاس بۆ خوا هەموو شتێک لە وڵاتدا باشە، بەڵام هیوادارین چەرخی ئابووری بەرەو پێشەوە بچێت و باش بین، دامەزراوە گشتییەکان بە قوتابخانەکانیشەوە داخران، هاوکات چەکدارانی تەحریرولشام لە دەوروبەری بانکی ناوەندی سووریا لە ناوەڕاستی پایتەخت جێگیر بوون.

 

لە گۆشەیەکی دیکەوە: عامر ئەلدەباس 61 ساڵ دەڵێت: سوپاس بۆ خوا شتەکان باشن ئێمە خەم و خەمۆکیمان بەجێهێشتووە ئێستا چاوەڕێی ئەوە دەکەین کە شتەکان وردە وردە باشتر بن.

 

ئەمەش بزانە: بانکی ناوەندی سووریا دڵنیایی دایە وەبەرهێنەران کە پارەکانیان "سەلامەتە" وردە وردە ژیان دەستی کرد بە گەڕانەوە بۆ سەر شەقامەکانی پایتەخت و هەندێک فرۆشگە دەرگاکانیان کردەوە.

 

 پوختە: سووریا لە گۆڕانکاری ڕیشەییدایە و جیهان چاودێری دۆخەکە دەکات، جۆرێک لە هیوا و ئومێد و جۆرێک لە ڕەشبینیش هەیە، ئەمەش بەهۆی دۆخەکەوەیە.