نەتانیاهۆ: بەرزاییەکانی جۆلان بۆ هەمیشە بەشێکە لە خاکی ئیسرائیل

ئاڤا نیوز

بنیامین نەتانیاهۆ، سەرۆک وەزیرانی ئیسرائیل جارێکی دیکە پێداگریی لەسەر ئەوە کردەوە کە بەرزاییەکانی جۆلان بۆ هەمیشە بەشێک دەبێت لە خاکی ئیسرائیل.

 

وێنە گەورەکە: دوای کۆتاییهاتنی دەسەڵاتی بەشار ئەسەد لە سووریا، ئیسرائیل دڵنیایی دەدات لەوەی هەرگیز دەستبەرداری ئەو بەشەی نابن کە لە سووریا داگیریانکردووە و هەمیشە وەک بەشێک لە خاکی ئیسرائیل دەمێنێتەوە.

 

لێدوانی فەرمی: بنیامین نەتانیاهۆ، سەرۆک وەزیرانی ئیسرائیل ڕایگەیاند: ''هەمووان هەست بە گرنگی بوونی ئێمە لە بەرزاییەکانی جۆلان دەکەن''.

 

لەلایەکی دیکەوە: نەتانیاهۆ باسی لە گرنگی بەرزاییەکانی جۆلانی کرد و گوتی، ''کۆنترۆڵی ئێمە بەسەر بەرزاییەکانی جۆلان گەرەنتی ئارامی و ئاسایشی وڵاتەکەمان دەکات، گەرەنتی سەروەریمان دەکات''.

 

زانیاریی زیاتر: نەتانیاهۆ لە درێژەی قسەکانی گوتی، "دەمەوێت سوپاسی هاوڕێکەم دۆناڵد ترەمپ، سەرۆکی هەڵبژێردراوی ئەمریکا بکەم کە داواکاریی منی بۆ داننان بە سەرکردایەتی ئێمە لە بەرزاییەکانی جۆلان لە ساڵی 2019 قبوڵکرد". ئەم بڕیارەی ترەمپ پێچەوانەی بڕیارەکانی نەتەوەیەکگرتووەکانە کە جۆلان وەک ناوچەیەکی داگیرکراو دادەنێت.

 

باکگراوند: ئیسرائیل لە ساڵی 1967 گەورەترین بەشی لە بەرزاییەکانی سووریا داگیرکرد و وەک بەشێک لە خاکی خۆی ناساندی، دوای گرژی و ئاڵۆزییەکانی سووریا و ڕووخاندنی دەسەڵاتی ئەسەد دەیەوێت بە تەواوی دەست بەسەر ئەو ناوچەیەدا بگرێت.