ئایدن مەعرووف: داوای مافی ڤیتۆمان بۆ پێکهاتەکان کردووە

ئاڤا نیوز

 

لە گفتوگۆکانی پێکهێنانی کابینەی دەیەمی حکومەتی هەرێمی کوردستاندا، بەشداریکردنی پێکهاتەکان بابەتێکی سەرەکییە، ئەوان داوادەکەن لەسەر بنەمای نەتەوەیی بەشدارییان لە حکومەتدا پێبکرێت نەک بنەمای کورسی.

 

وێنە گەورەکە: مانگی دووی ئەمساڵ دادگەی فیدراڵیی 11 کورسی پێکهاتەکانی لە پەرلەمانی کوردستان هەڵوەشاندەوە و پێنج کورسییان لە 100 کورسی گشتی بۆ تەرخانکرا، ئەمەش ناڕەزایی پێکهاتەکانی لێکەوتەوە ئێستا داوادەکەن لە پەرلەمانی کوردستان گۆڕانکاریی لە یاسای هەڵبژاردن بکرێت و کورسی پێکهاتەکان بۆ 11 کورسی زیاد بکرێت.

 

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان میوانی بەرنامەی نان و چای ئاڤا بوو گوتی، "لە ڕاپۆرتەکە داوادەکەین پێکهاتەکان مافی ڤیتۆیان هەبێت، چونکە لەماوەی ڕابردوو بەبێ ڕەزامەندی خۆیان چەند بڕیارێک بەسەریاندا سەپێنراوە، بەتایبەت ئەو بڕیارانەی دادگەی فیدراڵی سەبارەت بە کورسیی کوتاکان."

 

ئەوەی پێویستە بیزانیت: لە کۆبوونەوەی داهاتووی ئەنجوومەنی وەزیران، یەکێک لە بڕگەکان پەیوەستە بە خوێندنەوەی ڕاپۆرتێک لەلایەن وەزیری هەرێم بۆ کاروباری پێکهاتەکان سەبارەت بە دۆخی پێکهاتەکان. لە ڕاپۆرتەکەدا کۆمەڵێک داواکاریی ئاراستەی سەرۆکایەتیی ئەنجوومەنی وەزیران دەکەن.