هەولێر و نیودەلهی یاداشتێکی لێکتێگەیشتنی بازرگانی واژۆ دەکەن

ئاڤا نیوز 

 

ئەنجوومەنی بازرگانیی هیندستان بە ئامانجی پەرەپێدان بە پەیوەندییە بازرگانییەکانیان لەگەڵ هەرێمی کوردستان لە هەولێرن و یاداشتێکی لێکتێگەیشتنی بازرگانییان لەگەڵ ژووری بازرگانی هەولێر واژۆ کرد.

 

وێنە گەورەکە: هیندستان لە ڕیزبەندی چوارەمی ئەو وڵاتانە دێت کە زۆرترین قەبارەی بارزگانیی ساڵانەی لە هەرێمی کوردستان هەیە، ساڵانە کاڵا و خۆراک لەو وڵاتەوە هاوردە دەکرێن، ئامانجی ئەم لێکتێگەیشتنە ئەوەیە پەیوەندییەکان فراوان و پتەوتر بکرێن.

 

لێدوانی فەرمی: کاروان سوورچی، گوتەبێژی یەکێتیی ژوورەکانی بازرگانی و پیشەسازیی هەرێمی کوردستان بە ئاڤا نیوزی ڕاگەیاند، "ئەنجوومەنی بازرگانیی هیندستان و ژووری بازرگانی ڕێککەوتوون لەسەر ئەوەی کارئاسانی بۆ بازرگانانی هیندستان بکرێت، تاوەکو پرۆژەکانیان لە هەرێمی کوردستان پەرە پێبدەن، بەهەمان شێوەش بازرگانانی هەرێمی کوردستان بتوانن لە هیندستان مامەڵەی بازرگانی بکەن".

 

لەلایەکی دیکەوە: مستەفا شێخ عەبدولڕەحمان، سەرۆکی یەکێتیی هاوردە و ناردنکارانی هەرێمی کوردستان بە ئاڤا نیوزی گوت، "خواردەمەنی بەتایبەت برنج بەشی سەرەکی بەرهەمی هاوردەکراوی هیندستانە بۆ هەرێمی کوردستان، جگە لەوەش جل و بەرگ و قوماش بەشێکی دیکەی ئەو بەرهەمانە پێکدەهێنێت".

 

ئەوەی پێویستە بیزانیت: پتەوکردنی پەیوەندییە بازرگانییەکان لە چوارچێوەی پلانی حکومەتی هەرێمی کوردستان دێت بۆ تۆکمەترکردنی پەیوەندییە بازرگانی و ئابوورییەکانی نێوان هەرێمی کوردستان وڵاتانی جیهان، لەو پەراوێزەشدا بڕیارە لە ئاییدەیەکی نزیک هەولێر و نیودێلهی پڕۆژەی هاوبەش بکەن.