بلینكن بۆ سەرۆكوەزیران بارزانی: پشتیوانی حکومەتی خۆڕاگری هەرێمی کوردستانین

ئاڤا نیوز

 

سەرۆكوەزیران بارزانی، بە سەرۆكایەتی شاندێكی حكوميی لە ئەمریكایە و چەندین دیداری گرنگ لەگەڵ بەرپرسانی ئەو وڵاتە ئەنجام دەدات، وەزیری دەرەوەی ئەمریكا لە كۆبوونەوەی لەگەڵ سەرۆكوەزیران بارزانی لە واشنتن گوتی "پشتیوانی لە حکومەتی هەرێمی كوردستانی خۆڕاگر دەكەین". لەبەرامبەردا سەرۆكوەزیران بارزانی هاوپەیمانی لەگەڵ ئەمریكای بە "شانازیی" ناوبرد.

ئەمریكا ڕژدە لەسەر بەردەوامیدان بە هاوبەشی لەگەڵ هەرێمی كوردستان

ئەنتۆنی بلینكن، وەزیری دەرەوەی ئەمریكا ڕایگەیاند: "ئەمریكا ڕژدە لەسەر درێژەدان و بەردەوامیدان بە هاوبەشيی لەگەڵ هەرێمی كوردستان و گرنگە هەرێمی كوردستان سەركەوتوو بێت و گەلی كوردیش یەكگرتوو بێت، چونكە حكومەتی هەرێم هۆكاری سەقامگیریی ناوچەكەیە". بلینكن وای گوت.

هاوبەشییەكی درێژمان لەگەڵ حكومەتی هەرێمی كوردستاندا هەیە

ئەنتۆنی بلینكن گوتی: هاوبەشییەكی درێژمان لەگەڵ حكومەتی هەرێمی كوردستاندا هەیە و ئەو هاوبەشییەش لە پێش هەموو شتێكەوە لەسەر بەهای هاوبەش و بەرژەوەندیی هاوبەش و مێژوویەكی هاوبەشی قوربانیدان پێكەوە دامەزراوە و چەسپاوە. پشتیوانیی ئێمە بۆ حكومەتی خۆڕاگری هەرێمی كوردستان بەشێكە لەو ڕێبازە گشتگیرەی بۆ هەموو عێراق گرتوومانەتە بەر. بۆیە ئەم هەلەی ئەمڕۆ بۆ دووپاتكردنەوەی ئەم پشتیوانییە و دووپاتكردنەوەی ئەم هاوبەشییە و ئەو كارانەی پێكەوە دەیانكەین، پێم وایە زۆر گرنگە و لە كاتی خۆیدایە.

سەرۆكوەزیران بارزانی: شانازییە كە هاوپەیمانی ئەمریكاین

 سەرۆكوزیران بارزانی، لە دیدارەكەی لەگەڵ بلینكن گوتی: سوپاس، جەنابی وەزیر. سوپاس بۆ بانگهێشتكردنم. زۆر خۆشحاڵم كە گەڕاومەتەوە ئێرە بۆ واشنتن و بە تایبەتیش بۆ بینینی تۆ. بێگومان ئێمە دۆست و هاوبەشی زۆر باشی یەكترین و زۆر شانازییە بۆمان كە دەڵێین ئێمە هاوپەیمانی ئەمریكاین. بە كاتی زۆر دژواردا تێپەڕیوین. زۆر سوپاسگوزارین و سوپاسگوزاریی خۆمان بۆ ئەو پشتیوانییانەی ئەمریكا دەردەبڕین كە هەمیشە بە خەڵكی ئێمەیان داوە.