بە کلیکێک کێشەی مووچەخۆرانی هەرێمی کوردستان چارەسەر دەبێت

ئاڤا نیوز

ئاڤا نیوز چەند ڕێگەچارەیەک بۆ کێشەی دروستکردنی هەژماری بانکیی مووچەخۆرانی هەرێمی کوردستان دەخاتەڕوو،  ئاسانترینیان کردنەوەی هەژماری ئەلیکترۆنییە.

وێنە گەورەکە: بەپێی بڕیاری وەزارەتی دارایی عێراق، لە مانگی داهاتووەوە دابەشکردنی مووچە لە هەرێمی کوردستان بە شێوازی ئەلیکترۆنی لەڕێگەی بانکی ناوەندیی عێراقەوە دەبێت، بۆیە پێویستە سەرجەم مووچەخۆران هەژماری بانکییان هەبێت. 

لێدوانی فەرمی: مەولوود سابیر، بەڕێوەبەری گشتیی بانکە بازرگانییەکانی هەرێمی کوردستان  بە ئاڤا نیوزی گوت: دروستکردنی هەژمار و دەرهێنانی کارتی بانکی بۆ مووچەخۆران کارێکی ئاسانە و بە سیستمی (ICBS) بانکی  بە یەک کلیک دەتوانرێت یەک ملیۆن هەژمار دروست بکرێت. لە هەرێمی کوردستان 18 بانک هاوشێوەی بانکی ناوەندیی عێراق خاوەنی ئەم سیستمەن و ئامادەن بۆ دابەشکردنی مووچە بە شێوازی ئەلیکترۆنی. 

شێوازی جێبەجێکردن: حکومەتی هەرێمی کوردستان سەرجەم داتای مووچەخۆران بە پاکێجێک بۆ بانکی ناوەندیی عێراق دەنێرێت، لەوێ زانیارییەکان لە سیستمی (ICBS)ـی تۆمار دەکرێن و پێکەوە  هەژمار بۆ سەرجەمیان دروست دەکرێت. بەمشێوەیە هەر فەرمانبەرێک دەبێتە خاوەنی هەژمار و کۆدی نهێنی خۆی، کۆدەکەش لەڕێگەی فەرمانگەکەیەوە وەردەگرێتەوە. لە هەرێمی کوردستان 18 بانک بەم سیستەمە بەستراونەتەوە و فەرمانبەران ئازادن لە کامەیان مووچە وەربگرن.

 

چارەسەرەکان: بەگشتی چەند ڕێگەیەکی جیاواز هەن بۆ چارەسەرکردنی کێشەکە:

• 
  -    کردنەوەی هەژماری بانکی بە سیستمی (ICBS)ـی ئەلیکترۆنی بە یەک کلیک.
  -    لە ڕێگەی پڕۆژەی هەژماری من، کە تا ئێستا 200 هەزار کەس تۆمارکراون.
  -    لە ڕێگەی بانکی نیشتمانیی هەرێمی کوردستانەوە دەکرێت کە لەلایەن بانکی ناوەندیی عێراق مۆڵەتی پێدراوە، بەڵام تاوەکو ئێستا دانەمەزراوە.
  -    18 بانکی حکومی لە هەرێمی کوردستان هاوشێوەی بانکی ناوەندی خاوەنی سیستمی (ICBS)ین.
  - لە بانکی ناوەندییەوە پارە بۆ لقەکانی بانکی ڕەشید و ڕافیدەین لە هەرێمی کوردستان بنێردرێت و لەم لقانەوە مووچە دابەش بکرێت.

زانیاریی تایبەت: بڕیارە لە داهاتوویەکی نزیکدا شاندێکی تەکنیکی و کارگێڕيی وەزارەتی دارایی ‌‌عێراق سەردانی هەرێمی کوردستان بکات، بۆ گفتوگۆکردن لەبارەی چۆنیەتی دروستکردنی هەژمار و دەرهێنانی کارتی بانکی بۆ مووچەخۆران و ڕێکارەکانی جێبەجێکردنی بڕیارەکانی دادگەی فیدراڵی.

بۆچی گرنگە: لە هەرێمی کوردستان یەک ملیۆن و 202 هەزار و 727 مووچەخۆر هەیە، بە کردنەوەی هەژماری بانکی کێشەی فەوتان و دواکەوتنی مووچەیان نامێنێت.