بەنداوی تشرین هەڕەشە لەسەر عێراق دروست دەکات

ئاڤا نیوز

پسپۆڕانی کاروباری ئاویی عێراق هۆشداری لە لێکەوتەکانی بە ئامانجگرتنی بەنداوی تشرین لە ڕۆژهەڵاتی سووریا دەدەن و جەخت لەسەر ئەوە دەکەنەوە بە داڕمانی ئەو بەنداوە کارەساتی گەورە ڕووبەڕووی ئەو شوێنانە دەبێتەوە کە دەکەونە سەر ڕووباری فوڕات

 

وێنە گەورەکە: بەنداوی تشرین دووەم گەورەترین بەنداوی سووریایە دەکەوێت باشووری کۆبانێ لە ڕۆژئاوی کوردستان و لەژێر دەستی هێزەکانی سووریای دیموکراتە. لە دوو ڕۆژی ڕابردوودا ببووە ئامانجی سەرەکی هێرشەکانی تورکیا و گرووپە چەکدارەکانی نزیک لەو وڵاتە و سێ جار هێرشیان کردە سەر بەنداوەکە.

 

لێدوانی فەرمی: مەیسەم محەممەد، شارەزای بواری ئاو ڕایگەیاند: ئێمە لە عێراق لە نزیکەوە چاودێریی ئەو هەواڵانە دەکەین کە بەهۆی شەڕی سووریاوە بەنداوی تشرین زیانی پێگەیشتووە و لەگەڵ شارەزایانی سووریا لە پەیوەندیداین و ئاماژە بۆ ئەوە دەکەن "بەنداوەکە درزی تێکەوتووە".

 

پێدراوە ڕاستییەکان: بەنداوی تشرین توانای عەمبارکردنی 1.9 ملیار مەتر سێجا ئاوی هەیە، ئەگەر بێت و بەنداوەکە تووشی داڕمان بێت، ئەوا کارەساتێکی گەورەی مرۆیی لێدەکەوێتەوە.

 

مەترسییە پێشبینیکراوەکان: بە داڕمانی بەنداوەکە سێ شەپۆلی بەرزبوونەوەی ئاو دروست دەبێت، شەپۆلی یەکەمیان کە بەهێزەکەیانە، بە درێژایی 150 کیلۆمەتر ئاستی ئاو بۆ حەوت مەتر بەرز دەبێتەوە، شەپۆلی دووەمیش بە درێژایی 400 کیلۆمتر ئاستی ئاوەکە بە بەرزایی پێنج مەتر بەرز دەبێتەوە، شەپۆلی سێیەمیش کە کاریگەریی لەسەر عێراق دەبێت ئاستی ئاوی ڕووباری فورات بۆ سێ مەتر بەرز دەبێتەوە.

 

کاریگەریی و لێکەوتەکان: ئەو شارە عێراقییانەی دەکەونە سەر ڕووباری فورات لە پارێزگای ئەنبار، دەکەونە ژێر ئەو کاریگەرییە ئەگەر بێت و بەنداوە داڕمێت.