لیواکانی پاسەوانی سنوور لە هەرێمی کوردستان لە وەرگرتنی زەوی بێبەش دەبن

ئاڤا نیوز

 

بەگوێرەی نوسراوێکی نوسینگەی فەرماندەی گشتی هێزە چەکدارەکانی عێراق، هێزەکانی پاسەوانی سنوور زەوی وەردەگرن و دەبێت لیواکانیان لە هەرێمی کوردستان و پۆلیسی دەروازەکانیش بگرێتەوە، بەڵام لە هەرێمی کوردستان زەوی پێویست نییە بۆ ئەوەی پێیان بدرێت.

 

وێنە گەورەکە: هێزەکانی پاسەوانی سنووری عێراق چوار لیوایان لە دهۆک، سۆران، سلێمانی و پێنجوێن هەیە، ژمارەیان بە پۆلیسی دەروازەکانەوە زیاتر لە 12 هەزار کەسە، ئەرکیان پاراستنی سنوور و دەروازەکانە، لە سەرجەم ماف و دەسکەوتەکانی عێراق سوودمەند دەبن.

 

زانیاریی تایبەت: بەگوێرەی بەدواداچوونی ئاڤا کە لە هێزەکانی پاسەوانی سنوور زانیاریی دەستکەوتووە، ئەو هێزانە لە هەرێمی کوردستان زەوییان پێنادرێت، بەڵام دوو پێشنیاز بۆ قەرەبووکردنەوەیان خراونەتەڕوو.

 

بۆچوونی لایەنی بەرامبەر: سەربەست مەولود، بەڕێوەبەری بەشی یاسایی لە وەزارەتی شارەوانی هەرێمی کوردستان بە ئاڤای گوت، "بڕیاری دابینکردنی زەوی بۆ پاسەوانانی سنوور و پۆلیسی دەروازەکان لە دەسەڵاتی ئێمەدا نییە و  پێویستی بە بڕیاری ئەنجوومەنی وەزیران هەیە."

 

چارەسەرەکان چین؟ لە گفتوگۆی نوێنەرە باڵاکانی هەر چوار لیواکەی هەرێمی کوردستان لەگەڵ فەرماندەی گشتی هێزە چەکدارەکانی عێراق، دوو پێشنیاز وەک قەرەبوو خراونەتەڕوو، کە ئەمانەن:
１.    دابین کردنی زەوی لە  ناوچە سنوورییەکانی دەرەوەی ئیدارەی هەرێمی کوردستان.
２.    پێدانی بڕێک پارە کە نزیکەی 27 ملیۆن دینار دەبێت وەک قەرەبوو.