چوارەمین كۆڕبەندی گەشەپێدانی ئابووریی كوردستان بەڕێوەدەچێت

ئاڤا نیوز

بە بەشداری بەرپرسانی باڵای سەرۆكایەتییەكانی هەرێمی كوردستان و وەزارەتی بازرگانی و پیشەسازیی حكومەتی هەرێمی كوردستان، چوارەمین كۆڕبەندی گەشەپێدانی ئابووریی هەرێمی كوردستان سازكرا، تێیدا تاوتوێی ئاڵانگارییەكانی بەردەم دەرفەتی گەشەی ئابووریی هەرێمی كوردستان كرا.

 

وێنە گەورەكە: كونسوڵخانەی كۆریای باشوور لە هەرێمی كوردستان، بۆ ساڵی چوارەم لەسەریەك كۆڕبەندی گەشەپێدانی ئابووریی هەرێمی كوردستان 'Du Ks Eco' ڕێكدەخات، ئەمساڵیش بە بەشداری دەزگا پەیوەندیدارەكانی حكومەتی هەرێمی كوردستان و بەشێك لە كۆمپانیا بازرگانییەكان لە ڕۆژانی 18 و 19/ 12/ 2024 لە هەولێری پایتەخت بەڕێوەچوو.

 

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاویكردووەتەوە، لەسەر بانگهێشتی فەرمیی سنچۆڵ لیم، کونسوڵی گشتیی کۆماری کۆریای باشوور لە هەرێمی کوردستان، نوێنەرایەتیی هەر یەك لە سەرۆکایەتییەکانی هەرێمی کوردستان، سەرۆکایەتیی ئەنجومەنی وەزیران، بریکاری وەزارەتی بازرگانی و پیشەسازی، بۆ کاروباری بازرگانی، ڕێکخراوەکانی کۆمەڵگەی مەدەنی و کەسانی ئەکادیمی و پسپۆر، چوارەمین کۆڕبەند بۆ گەشەپێدانی ئابووریی هەرێمی کوردستان سازكرا.

 

بابەتە ستراتیژییەکە: لەم كۆڕبەندەدا بابەتی ستراتیژیەتی گەشەپێدانی ئابووریی هەرێمی کوردستان گفتوگۆی لەبارەوە كرا و بەشداربووان سەرنج و بۆچوونەكانیان خستەڕوو.

 

بۆچی گرنگە: لە كۆڕبەندی گەشەپێدانی ئابووری، ئاڵانگارییەکان و دەرفەتی گەشە و پەرەپێدانی ئابووریی هەرێمی کوردستان تاوتوێ کرا و خاڵی گرنگ و ئەرێنی خرایە كارنامەی داهاتووی حكومەتی هەرێمی كوردستان.