ئەمریکا و شەرع تاوتوێی هەڵگرتنی سزاکانی سەر سووریا دەکەن

ئاڤا نیوز

 

سەرچاوەیەکی ڕۆژنامەوانی باس لەوەدەکات، لە کۆبوونەوەی شاندی ئەمریکا و ئەحمەد شەرع، بەرپرسی ئیدارەی نوێی سووریا گفتوگۆ لەبارەی هەڵگرتنی سزاکانی سەر سووریا و دەرکردنی دەستەی تەحریرولشام لە لیستی تیرۆری ئەمریکا کراوە.

 

وێنە گەورەکە: ئەمڕۆ هەینی، شاندێکی ئیدارەی جۆ بایدن گەیشتە دیمەشقی پایتەختی سووریا و لەگەڵ ئەحمەد شەرع، بەرپرسی ئیدارەی نوێی سووریا کۆبوونەوە، بەمەبەستی دەستپێکردنی گفتوگۆکانی ئەمریکا لەگەڵ دەسەڵاتدارانی نوێی سووریا. 

 

ڕاگەیێنراوی فەرمی: ڕۆژنامەی "وەتەن"ی سووری ڕایگەیاند: شاندەکەی ئەمریکا لەگەڵ ئەحمەد شەرع گفتوگۆی لەسەر هەڵگرتنی سزاکانی سووریا کردووە لەوانەش "یاسای قەیسەر"، هاوکات گفتۆگۆیان دەربارەی دەرکردنی دەستەی تەحریرولشام لە لیستی تیرۆری ئەمریکا کردووە.

 

ئەوەی پێویستە بیزانیت: هەریەک لە باربارا لیف، یاریدەدەری وەزارەتی دەرەوەی ئەمریکا بۆ کاروباری رۆژهەڵاتی ناوەڕاست و دانیاڵ رۆبینستاین، نوێنەری پێشووی ئەمریکا بۆ کاروباری سووریا ئەندامی شاندەکەن و لەگەڵ شەرع کۆبوونەتەوە، ئەمەش وەکو هەنگاوێکی سەرەتایی ئەمریکا بۆ دەستپێکردنی گفتوگۆکان دەبینرێت.

 

ئەمەش بزانە: پێشتریش هەریەک لە وڵاتانی بەریتانیا، فەرەنسا و ئەڵمانیا شاندیان بۆ دیمەشق ناردووە و لەگەڵ ئەحمەد شەرع کۆبوونەوە و باسیان لە دروستکردنی پەیوەندی نێوانیان کردووە.