بەفر ڕێگای هاتووچۆی نێوان چۆمان و حاجی ئۆمەران دادەخات

ئاڤا نیوز

لە ناوچە شاخاوییەكانی سنووری پارێزگای هەولێر بەفرێكی زۆر باریوە، بەهۆیەوە ڕێگەی هاتووچۆی نێوان شارۆچكەی چۆمان و حاجی ئۆمەران بۆ ماوەیەك داخرا.

 

وێنە گەورەكە: شەپۆلێكی سەرماوسۆڵە و بەفربارین هەرێمی كوردستانی گرتووەتەوە، شەوی ڕابردوو لە ناوچە شاخاوییەكانی سنووری پارێزگای هەولێر بەفرێكی زۆر باری و پلەكانی گەرماش بۆ خوار سفری سەدی دابەزین.

 

ئەوەی پێشبینی دەكرا: پێشتر شێخ دارا، شارەزای کەشناسی و پێشکەشکاری کەشوهەوای ئاڤا میدیا پێشبینی كردبوو؛ لە دوێنێ هەینییەوە شەپۆلێکی بەفر و بارانبارین زۆربەی ناوچەکانی هەرێمی كوردستانی بگرێتەوە، لە سەنتەری شارۆچكەی چۆمانیش لە سنووری پارێزگای هەولێر، 15 سانتیمەتر بەفر باریوە، پلەكانی گەرماش حەوت پلە دابەزیون و پلەی گەرمی تۆماركراو ژێر سفری سەدییە.

 

ئەوەی پێویستە بیزانیت: تیمەکانی بەڕێوەبەرایەتیی چاککردنەوە و پاراستنی ڕێگاوبانی ئیدارەی سۆران لە شەوی ڕابردووەوە سەرقاڵی ڕاماڵینی بەفری سەر ڕێگای سەرەكی چۆمان - حاجی ئۆمەران بوون و ڕێگەیان نەدا هاتووچۆی ئۆتۆمبێل بۆ ماوەیەكی زۆر پەكی بكەوێت.

 

زانیاریی بەدەستهاتوو: سەرەڕای بەردەوامی بەفربارین، هاتووچۆی گەشتیاری و جموجۆڵی بازرگانی لە دەروازەی نێودەوڵەتیی حاجی ئۆمەران نەوەستاوە.