لە پارێزگایەکی عێراق 700 ژن فێڵ لە حکومەت دەکەن

ئاڤا نیوز

لە پارێزگای زیقاری باشووری عێراق ناوی 700 ژن ئاشکرا بووە کە بەنایاسایی مووچەی چاودێری کۆمەڵایەتییان وەرگرتووە، بەجۆرێک ئەو ژنانە شویان کردووەتەوە یان کاریان دەستکەوتووە، بەڵام هەر مووچەی بێوەژنانە و بێکارییان لە دەوڵەت وەرگرتووە.

ئەوەی پێویستە بیزانیت: بەگوێرەی یاسا کەسانی بێکار، بێوەژن، هاوسەری سزادراون، خاوەن پێداویستی تایبەت لەگەڵ کۆمەڵێک چین و توێژی دیکە کە لەژێر هێڵی هەژاریدان، لە مووچەی چاودێریی کۆمەڵایەتی دەوڵەت سوودمەند دەبن ،کە بڕەکەی لەنێوان 210 بۆ 315 هەزار دینارە، ئێستاش حەوت ملیۆن و 600 هەزار کەس لە عێراق ئەو مووچەیە وەردەگرن.

لێدوانی فەرمی: نوفڵ عەبدولحەمید، بەڕێوەبەری فەرمانگەی چاودێریی ژنان لە پارێزگای زیقار بە ئاڤا میدیای ڕاگەیاند، لەڕێگەی دەستەی چاودێریی کۆمەڵایەتی، وەزارەتی داد و بە سوودوەرگرتن لە ناوەندیی ئامار، بۆیان دەرکەوتووە هەندێک ژن هاوسەرگیرییان کردووەتەوە، بەڵام لای ئەوان بە ناوی بێوەژن هەر مووچەیان وەرگرتووە، یان هەندێکی دیکەیان دامەزراون و کاریان دەستکەوتووە لەکاتێکدا بەردەوامیش بوون لە وەرگرتنی مووچەی بێکاری.

بەوتەی ئەو بەرپرسەی وەزارەتی کار و کاروباری کۆمەڵایەتیی عێراق، ڕێکاری یاسایی دژی ئەو 700 کەس دەگرنەبەر، ڕێكکارەکەش بریتییە لە بڕینی مووچەکانیان، کاریش دەکەن بۆ گەڕانەوەی ئەو پارەیەی وەریانگرتووە دوای ئەوەی هاوسەرگیرییان کردووەتەوە یان چوونەتەسەر کار، ئەوەش بە ئامانجی جێبەجێکردنی دادپەروەری و پاراستنی مافی ئەوانەی شایستەن.