ساڵی ئایندە ڕێبەری ئەلیکترۆنی گەشتیاری بە سێ زمان بەردەست دەبێت

ئاڤا نیوز

 

 بە مەبەستی دابینکردنی ئاسانکاری زیاتر بۆ گەشتیاران، دەستەی گەشتوگوزاری هەرێمی کوردستان لەگەڵ کۆمپانیایەکدا هەماهەنگی کردووە بۆ ئەوەی لە ساڵی 2025 ڕێبەرێکی ئەلیکترۆنی گەشتیاریی بەردەست بکرێت، تەواوی زانیاریی لەسەر ناوچە گەشتیارییەکان لە خۆبگرێت بە زمانەکانی کوردی، عەرەبی، ئینگلیزی.

وێنە گەورەکە: گەشتوگوزار وەک بنەمایەکی گرنگ بۆ بەهێزکردنی ژێرخانی ئابووری هەرێمی کوردستان مامەڵەی لەگەڵ دەکرێت ساڵ دوای ساڵ قەبارەی ئابووری و بوونیادنانی پڕۆژەی گەشتیاری ڕوو لە ‌هەڵکشانن، لە ماوەی کابینەی نۆیەم زیاتر لە نۆ ملیار دۆلار قەبارەی وەبەرهێنانی گەشتیاریی بووە.

 

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزاری هەرێمی کوردستان بە ئاڤای گوت، "ساڵی 2025 هەنگاوە پراکتیکییەکانی دروستکردنی ڕێبەری گەشتیاریی ناوچە گەشتیارییەکانی هەرێمی کوردستان دەست پێدەکات و تەواوی ناوچە گەشتیارییەکان لەسەری تۆماردەکرێت."

 

ئەوەی پێویستە بیزانیت: ئەو ڕێبەرە ئەلیکترۆنییە کە بۆ هەردوو سیستەمی IOS و ئەندرۆید بەردەست دەبێت کۆمەڵێک تایبەتمەندی سەرنجڕاکێش لەخۆدەگرێت، لەوانە:

ــ دابه‌زاندنی بێ به‌رامبه‌ر به‌ ئه‌نته‌رنێت.
ــ کارکردن بەشێوەی ئۆفلاین.
ــ ئاسانی گه‌ڕان بەدوای شوێنه‌ گه‌شتوگوزارییەكان.
ــ دیاریکردنی مەودای دووریت لە شوێنە گەشتیارییەکان.
ــ نرخی کاڵا و خواردنەکان.
ــ هه‌ڵسه‌نگاندنی گه‌شتیار ده‌رباره‌ی شوێنه‌كان.
ــ بە زمانەکانی کوردی، عه‌ره‌بی و ئینگلیزی بەردەست دەبێت.
ـ نوێكردنه‌وه‌ بەخۆڕایی.