کۆمپانیا نەوتییەکانی هەرێمی کوردستان سکاڵایەک لە عێراق دەبەنەوە

ئاڤا نیوز

ژمارەیەک کۆمپانیای نێودەوڵەتیی نەوت کە لە هەرێمی کوردستان کار دەکەن، سکاڵایەکیان لە دادگای کەرخ دژی حکومەتی عێراق بردەوە.

 

ڕاگەیێنراوی فەرمی: پێگەی عێراق ئۆیل بڵاویکردەوە، کۆمپانیا نەوتییە نێودەوڵەتییەکان کە لە کێڵگە نەوتییەکانی هەرێمی کوردستان کار دەکەن، لە دادگای کەرخ سکاڵایەکیان لە حکومەتی عێراق بردووەتەوە، کە بەهۆی هەڵوەشاندنەوەی گرێبەستی کۆمپانیاکان لەگەڵ حکومەتی هەرێمی کوردستان تۆماریان کردبوو.

 

بۆچی گرنگە؟ پێگەکە ئەو بردنەوەیەی بە "سەرکەوتنێکی گەورەی کۆمپانیاکان" بەرامبەر وەزارەتی نەوتی حکومەتی عێراق وەسف کردووە، بەهۆی ئەوەی پێشتر وەزارەتەکە چەندین گرێبەستی کۆمپانیاکانی لەگەڵ حکومەتی هەرێمی کوردستان بەبیانووی چوونی پارەیەکی زۆری داهاتی نەوتی هەرێم بۆ کۆمپانیاکان هەڵوەشاندبووەوە.

 

کاریگەریی و لێکەوتەکان: پێگەی عێراق ئۆیل دەشڵێت: پێدەچێت ئەو بردنەوەیە کۆتایی بە هەڵمەتە یاساییەکەی حکومەتی عێراق دژ بە کۆمپانیا نەوتییە نێودەوڵەتییەکان کە لە هەرێمی کوردستان کاردەکەن، بهێنێت.

 

زانیاریی زیاتر: ئەو کۆمپانیانەی سکاڵایان تۆمارکردبوو بریتی بوون لە ئەداکس، دانا گاز، دی ئێن ئۆ، گازپرۆم نێفت، جێنێل ئینێرجی، گالف کیستۆن، ئێچ کەی ئێن ئینێرجی، شاماران، و وێستەرن زاگرۆس.