وەزیری تەندروستی: دابەشکردنی پارەی هەڵمەتی کوتان دەستیپێکردووەتەوە

ئاڤا نیوز

 

وەزیری تەندروستیی هەرێمی کوردستان لەبارەی دابەشکردنی پارەی هەڵمەتی کوتانی سییانی دەڵێت، چوار ڕۆژە بڕیاری خەرجکردنی پارەکە دراوە و دابەشکردنەکەش دەستیپێکردووە.

 

وێنە گەورەکە: هەڵمەتێکی فراوانی نیشتمانی کوتان لە باخچەی ساوایان و قوتابخانە سەرەتاییەکانی هەرێمی کوردستان، لە ماوەی دوو هەفتەدا کرا.

 

لێدوانی فەرمی: د.سامان بەرزنجی، وەزیری تەندروستی حکومەتی هەرێمی کوردستان، بە ئاڤا میدیای ڕاگەیاند: نووسراوەکەی بەغدا لە 8-10-2024، دەرچووە، 24-11-2024، لە وەزارەتی دارایی هەرێمی کوردستان بە ژمارە (7066) تەرخانی بۆ کراوە و لە وەزارەتی دارایی و ئابووری دەرچوو.

 

بە وتەی وەزیری تەندروستی، پارەی کوتانەکە یەک ملیار و 75 ملیۆن و 926 هەزار دینارە، ڕۆژی 18-12-2024 بڕیاری خەرجکردنی دراوە، واتە چوار ڕۆژە بڕیاری خەرجکردنی دراوە و دابەشکردنەکەی دەستیپێکردووە.

 

ئەمەش بزانە: 873 هەزار و 191 منداڵ لە هەڵمەتەکەدا کوتانی سورێژەی تێکەڵاو MMR یان بۆ کراوە.