وەزارەتی دارایی کار بۆ یەکسانکردنەوەی بڕوانامەکانی بێ مۆڵەت دەکات

ئاڤا نیوز 

وەزارەتی دارایی و ئابووری حکومەتی هەرێمی کوردستان گشتاندن بۆ سەرجەم وەزارەتەکان کردووە بۆ ئەوەی کار لەسەر یەکسان کردنەوەی بڕوانامەکانی بێ موڵەت بکەن.

 
نووسراوی فەرمی: وەزیری دارایی نووسراوێکی بە ژمارە 2641/1/1 لە ڕێکەوتی 22ی12ی2024، بۆ گشت وەزارەت و فەرمانگە نەبەستراوەکان کردووە، سەبارەت بە پۆلینکردنی ئەو بڕوانامانەی بەبێ مۆڵەت بەدەستهاتوون.

 

زانیاری زیاتر: لە نووسراوەکە هاتووە ئیمێلی وەزارەت یان دەستەکەتەکان، لەگەڵ نوێنەر و ژمارەی مۆبایلی تاوەکو هاوکارمان بن لە پڕکردنەوەی زانیاریی و وەرگرتنی داتای پێویست بۆ پۆلینکردن و هەڵسەنگاندنی ئەو بڕوانامانەی بەبێ مۆڵەت بەدەستهاتوون.

 

ڕێککارەکانی چارەسەر کردن: وەزیری دارایی، داوای ڕوونکردنەوەی لێکەوتەکانی ئەو پرۆسەیەی کردبوو،  ئایا ئێستا چەند دەکەوێت و ئەگەر بڕوانامە هەژمارکرا مووچەیان دەبێتە چەند و بڕی چەند پارەی پێویستە؟ 

 

ئەوەی پێویستە بیزانیت: لە فۆڕمەکەی ئێستا دوو بڕگە زیاد دەکرێت، پێویستە سەرجەم فەرمانبەرەکان پڕیبکەنەوە کە مووچەی ئێستایان چەندە و دوای هەژمارکردنی بڕوانامە مووچەکەی دەبێتە چەند.

 

باکگراوند: سەرەتای ئەمساڵ حکومەتی هەرێمی کوردستان بڕیارێکی لە بەرژەوەندی ئەو کەسانە دا کە بەبێ مۆڵەتی خوێندن چوونەتەوە بەر خوێندن و دیبلۆمی باڵا، ماستەر و دکتۆریان خوێندووە، دواتر لیژنەیەک لە سێ وەزارەت بەسەرپەرشتی وەزیری دارایی پێکهێنرا بۆ ئەوەی بەدواداچوون لەسەر ئەو پرسە بکرێت بەمەبەستی یەکسانکردنی بڕوانامەکانیان.