لیستی 100 هەزار فەرمانبەر بۆ وەرگرتنی زەوی ڕەوانەی ئەنجوومەنی وەزیران دەکرێت

ئاڤا نیوز

 

دوای دوو هەفتە لە وەستانی، ڕێکارەکانی دابەشکردنی زەوی بەسەر فەرمانبەران و خانەنشینانی کوردستان دەستپێدەکاتەوە، بۆ ئەو مەبەستەش لیستی ناوی 100 هەزار فەرمانبەری دیکە ڕەوانەی ئەنجوومەنی وەزیران دەکرێت.

 

وێنە گەورەکە: لە بەشێکی ناوچەکانی هەرێمی کوردستان قۆناغی یەکەمی پرۆسەی دابەشکردنی زەوی تەواوبووە، بەهۆی هەبوونی گرفت لە لیستی ناوی فەرمانبەرانی بەشێک لە وەزارەت و کێشەی دابینکردنی زەوی لەلایەن شارەوانییەکان قۆناغی دووەم دواکەوتووە.

 

لێدوانی فەرمی: ساسان عەونی، وەزیری شارەوانی و گەشتوگوزار بە ئاڤای گوت، "کێشەی لیستی ناوەکان چارەسەرکراوە و لەم هەفتەیە واژۆ لەسەر لیستی 100 هەزار کەس بۆ وەرگرتنی زەوی دەکەین و ئاراستەی ئەنجوومەنی وەزیران دەکرێت بۆ پەسەند کردنی."

 

ئەوەی پێویستە بیزانیت: بە کۆی گشتی 300 بۆ 350 هەزار فەرمانبەر و خانەنشین زەوییان پێدەدرێت، ئێستا لە هەرچوار پارێزگای هەرێمی کوردستان نزیکەی 200 هەزار پارچە زەوی ئامادەکراون یان لە قۆناغی کۆتایی ئامادەکردندان.