نۆ وڵاتی دیکە بەفەرمی دەبن بە ئەندامی کۆمەڵەی بریکس

ئاڤا نیوز

 

فراوانبوونی کۆمەڵەی بریکس بەردەوامە و سەرەتای مانگی داهاتوو نۆ وڵاتی نوێ بە فەرمی وەک ئەندامی کۆمەڵەکە دەناسێنرێن.

 

وێنە گەورەکە: تادێت ژمارەی وڵاتانی ئەندام لە کۆمەڵەی بریکس زیاتر دەبێت، دوای بەڕێوەچوونی لوتکەی کۆمەڵەکە لە کازانی ڕووسیا لە مانگی ئۆکتۆبەر، بەشێک لەو وڵاتانەی بانگێشتی لووتکەکە کرابوون بەشێوەی هاوبەش وەک ئەندامی نوێ لە کۆمەڵەکە پەسەندکران.

 

ڕاگەیێنراوی فەرمی: وەزارەتی دەرەوەی ڕووسیا ڕایگەیاند: لە یەکی مانگی داهاتوو نۆ وڵاتی نوێ بەفەرمی دەبنە ئەندام لە کۆمەڵەکە، کە پێکدێن لە بیلاڕووسیا، کوبا، بۆلییڤیا، ئەندەنوسیا، مالیزیا، تایلاند، ئۆگەندا، ئۆزبەکیستان و کازاخستان بەشێوەی وڵاتی هاوبەش بەشداری لە کۆمەڵەکە دەکەن.

 

باکگراوند: جگە لە بەڕازیل، ڕووسیا، هیندستان، چین و ئەفریقیای باشوور هەریەک لە میسر و ئەسیوبیا و ئێران و ئیمارات ئەندامی کۆمەڵەکەن و بە بەشداریکردنی ئەم نۆ وڵاتەی سەرەوە هەژموونی کۆمەڵەکە لەسەر ئابووری جیهان فراوانتر دەبێت و کاریگەری لەسەر هەژموونی خۆرئاوا دروست دەکات. 

 

لەلایەکی دیکە: لە ڕاگەیێنراوەکەی وەزارەتی دەرەوەی ڕووسیادا هاتووە کە چوار وڵاتی دیکە ئامانجیانە هاوشێوەی ئەم نۆ وڵاتە بە هاوبەشی بەشداری بکەن.