سەرۆکوەزیرانی کوردستان و بەرپرسێکی باڵای ئەمریکا تاوتوێی کێشەکانی هەولێر و بەغدا دەکەن

ئاڤا نیوز

 

سەرۆکوەزیران مەسرور بارزانی و یاریدەدەری وەزیری دەرەوەی ئەمەریکا بۆ کاروباری وزە، پرسی هەناردەکردنەوەی نەوتی هەرێمی کوردستان و چەند پرسێکی دیکە تاوتوێ دەکەن.

 

وێنە گەورەکە: ڕۆژی هەینی 3-1-2025، سەرۆکوەزیران مەسرور بارزانی پەیوەندییەکی تەلەفۆنی لە جێفری پایت، یاریدەدەری وەزیری دەرەوەی ئەمەریکا بۆ کاروباری وزە پێگەیشت و پەرەپێدانی پەیوەندیی دوولایەنە و هەناردەکردنەوەی نەوتی هەرێمی کوردستانیان تاوتوێ کرد.

 

ڕاگەیێنراوی فەرمی: بەپێی ڕاگەیێنراوی حکومەتی هەریمی کوردستان، لە پەیوەندییەکەدا هەردوولا هاوڕابوون لەسەر گرنگی چارەسەرکردنی کێشەکان و نەهێشتنی ئاستەنگەکانی بەردەم هەناردەکردنەوەی نەوتی هەرێمی کوردستان لە زووترین کاتدا، چونکە وەستانی زیانێکی زۆری لە بودجەی گشتیی عێراق داوە.

 

زانیاریی زیاتر: هەردوولا جەختیان لە پێویستیی دابینکردنی ماف و شایستە داراییەکانی هەرێمی کوردستان بەپێی دەستوور و ڕۆڵی گرنگی هەرێمی کوردستان لە برەودان بە سەربەخۆیی عێراق لە بواری وزە، گەشەپێدانی ئابووری و سەقامگیریی ناوچەکە کردەوە.

 

ئەوەی پێویستە بیزانیت: هەر لە ڕاگەیێنراوەکەی سەرۆکوەزیراندا هاتووە، بەهۆی دەستپێنەکردنەوەی هەناردەی نەوتی هەرێمی کوردستان، تاوەکو ئێستا زیاتر لە 25 ملیار دۆلار زیان بەر بودجەی گشتیی عێراق گەیشتووە.