د.فازڵ نەبی: مووچەی مانگی 12ی مووچەخۆران دەفەوتێت

ئاڤا نیوز

 

بریکاری پێشووی وەزارەتی دارایی عێراق ڕایدەگەیێنێت، ساڵی دارایی لە عێراق کۆتایی هاتووە و "مووچەی مانگی 12ی مووچەخۆرانی هەرێمی کوردستان دەفەوتێت".

 

وێنە گەورەکە: ڕۆژی یەکشەممە 5-1-2024، دەست دەکرێت بە دابەشکردنی مووچەی مانگی 11 و لە ماوەی چوار ڕۆژدا مووچەی سەرجەم وەزارەتەکان دابەش دەکرێت.

 

لێدوانی فەرمی: د.فازڵ نەبی، بریکاری پێشووی وەزارەتی دارایی عێراق بە ئاڤا میدیای ڕاگەیاند: بەدەستهێنانی مووچەی مانگی 10 مووچەخۆان ئاسان بوو، بەڵام مانگی 11 وەک ئەوە وابوو لە دەمی شێری دەربهێنێت، هاوکات مووچەی مانگی 12 لە قورگی شێردایە و فەوتاوە، هەروەها ساڵی دارایی لە عێراق کۆتایی هاتووە.

 

ئەوەی پێویستە بیزانیت: لە ساڵی 2024،  تەنها 10 مووچە بەسەر مووچەخۆرانی هەرێمی کوردستاندا دابەشکرا، چونکە وەزارەتی دارایی عێراق لە کۆی 11 ترلیۆن و 576 ملیار و 521 ملیۆن دینار، 10 ترلیۆن و 752 ملیار و 582 ملیۆن پارەی نارد و نزیکەی 824 ملیار دینار ماوە بنێردرێت.

 

ئەمەش بزانە: پێشتر وەزارەتی دارایی و ئابووری حکومەتی هەرێمی کوردستان لە ڕاگەیێنراوێکدا ڕایگەیاند، سەرەڕای مافی دەستووری و یاسای بوودجە، هاوکات بڕیاری دادگای فیدراڵی بۆ خەرجکردنی مووچەی فەرمانبەرانی هەرێمی کوردستان هاوشێوەی مووچەخۆرانی دیکەی عێراق و تەرخانکراوی پێویست لە خشتەکانی یاسای بوودجە، بەڵام عێراق پێشێلی مافە دەستوورییەکان دەکات.