پێنتاگۆن پەیامی نوێی لەبارەی ڕۆژئاوای کوردستان و سووریا هەیە

ئاڤا نیوز

 

وەزارەتی بەرگریی ئەمریکا (پێنتاگۆن) ڕایگەیاند، وڵاتەکەی پێشوازی لە ڕاگرتنی گرژییەکانی سووریا دەکات و دەیانەوێت گرنگی بە زیادکردنی سەقامگیری لە ناوچەکە بدرێت.

 

لێدوانی فەرمی: سابرینا سینگ، جێگری وتەبێژی وەزارەتی بەرگریی ئەمریکا ڕایگەیاند:

- هانی وەستاندنی گرژی و ناکۆکییەکان لە نێوان هێزەکانی سووریای دیموکرات (هەسەدە) و هێزەکانی دیکەی ناوچەکە دەدەین و پێشوازی لە ڕاگرتنی گرژییەکان دەکەین.

- پشتگیری لە وەستاندنی هەموو توندوتیژییەکان لە سووریا دەکەین، ئێستا کاتی گرنگیدان و زیادکردنی سەقامگیرییە لە ناوچەکەدا، ئەمریکا پشتگیری لە یەکپارچەیی خاکی سووریا دەکات.

- سەرنجمان لەسەر پێشخستنی پرۆسەیەکی سیاسی گشتگیرە کە هاووڵاتیانی سووریا خاوەنی بن، لەهەمان کاتدا سەرنجمان لەسەر شکستپێهێنانی داعشە لە سووریا.

 

باکگراوەند: ڕووبەڕووبوونەوەی هێزەکانی سووریای دیموکرات (هەسەدە) و گرووپە چەکدارەکانی نزیک لە تورکیا لە باشووری ڕۆژهەڵاتی منبج و بەنداوی تشرین بەردەوامە، لە ماوەی دوو ڕۆژی ڕابردوو نزیکەی 100 کوژرا و بریندار لە هەردوولادا هەیە.