تورکیا لە ڕیزبەندی یەکەمی ئەو وڵاتانەیە لە هەرێمی کوردستان وەبەرهێنان دەکەن

ئاڤا نیوز

 

لەسەر ئاستی جیهان بۆ وەبەرهێنانی بیانی لە هەرێمی کوردستان، تورکیا لە پلەی یەکەمدایە، هاوکات زۆرترین مۆڵەتی بازرگانان بۆ هاوردەکردنی کاڵا و شمەک هەر لەڕێگەی ئەو وڵاتەوەیە.

 

وێنە گەورەکە: وەبەرهێنەرانی تورکیا نزیکەی 20 پرۆژەی وەبەرهێنانیان لە هەرێمی کوردستان هەیە و سەرمایەی بەگەڕخراویان نزیکەی دوو ملیار دۆلارە، پەیوەست بە بازرگانیش لە سێ هەزار و 705 مۆڵەتی بازرگانی، دوو هەزار و 767 مۆڵەتیان بۆ هاوردەکردنە لە ڕێگەی دەروازەی نێودەوڵەتی ئیبراهیم خەلیل-وە.

 

لێدوانی فەرمی: بەرگەشت ئاکرەیی، وتەبێژی دەستەی وەبەرهێنانی حکومەتی هەرێمی کوردستان بە ئاڤا میدیای ڕاگەیاند: پرۆژەکانی تورکیا بۆ وەبەرهێنان لە هەرێمی کوردستان لە کەرتەکانی پیشەسازیی خۆراک، نیشتەجێبوون، بیناسازی و بابەتی دیکەن، ئامانجیشمانە ژمارەی پرۆژەکانی وەبەرهێنانی بیانی لە هەرێمی کوردستان زیاتربکەین و دەرفەتی زیاتریش بۆ وەبەرهێنەر و بازرگانان بڕەخسێنین.

 

لەلایەکی دیکەوە: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا میدیای ڕاگەیاند: مۆڵەتە بازرگانییەکانی هاوردەکردنی کاڵا و شمەک لە کۆی زیاتر لە هەشت ملیار دۆلار، شەش ملیار و 552 ملیۆن و 836 هەزار دۆلاریان لە دەروازەی نێودەوڵەتیی ئیبراهیم خەلیلەوە مۆڵەتی بازرگانییان وەرگرتووە تاوەکو کاڵا و شمەک لە تورکیاوە بهێنن، یان لە ڕێگەی ئەو وڵاتەوە هاوردەی هەرێمی کوردستان بکرێن.

 

زانیاریی زیاتر: لە بازرگانی ئۆتۆمبێلیشدا لە 924 مۆڵەتی بازرگانی بۆ هێنانی ئۆتۆمبێل، 313 مۆڵەتیان لەڕێگەی دەروازەی ئیبراهیم خەلیلەوەیە و لە 171 هەزار و 954 ئۆتۆمبێلی هاوردەکراو، زیاتر لە 80 هەزاریان لە ڕێگای تورکیاوە داخڵکراون.

 

ئەوەی پێویستە بیزانیت: لە 183 پرۆژەی وەبەرهێنان بۆ ساڵی 2024 لە هەرێمی کوردستان، 41 مۆڵەت بە پرۆژە بازرگانییەکان دراوە بە سەرمایەی 387 ملیۆن و 520 هەزار و 148 دۆلار.