ڕۆژنامەیەکی لوبنانی: ئێران باڵەکانی لە ناوچەکەدا ڕێکدەخاتەوە

ئاڤا نیوز 

 

ئێران نەوەیەکی نوێی مووشەکی بالیستی دەگەیەنێتە هێزەکانی حەشدی شەعبی و داواش لە "بەرەی مقاوەمە" دەکات هیرشەکانیان بۆ سەر ئیسرائیل ڕابگرن. 

 

وێنە گەورەکە: میدیای لوبنان هەوڵەکانی ئێرانی بۆ ڕێکخستنەوەی باڵەکانی لە ناوچەکە ئاشکرا کرد، هاوکات تاران بەرهەمهێنانی مووشەکی بالیستی و درۆنی پێشکەوتووی دوو هێندە زیاد کردووە و بەشیکی زۆریشی ڕادەستی "میحوەری مقاوەمەی ئیسلامی"ـی کردووە، لەنێویاندا چەکدارانی هێزەکانی حەشدی شەعبی لە عێراق.

 

‎ڕاگه‌یێنراوی فه‌رمی: ماڵپەڕی جەریدەی لوبنانی لە زاری سەرچاوەیەکی بەرپرس لە سوپای قودسی ئێرانی بڵاویکردەوە: تاران پرۆسەی ڕێکخستنی ڕیزەکانی میحوەری "بەرەی مقاوەمەی" لە ناوچەکە دەستپێکردووە و چەندین فەرماندەی گواستووەتەوە و جێگۆرکێی بە ژمارەیەکی زۆر کردووە.

 

هۆكاره‌ زانراوه‌كان:  ئەو سەرچاوەیە ئەوەشی خستەڕوو کە دەزگا ئەمنییەکانی سوپای پاسداران ئۆپەراسیۆنێکی فراوانیان بۆ ئاشکراکردنی ئەو سیخوڕانە دەستپێکردووە کە بۆ ئیسرائیل کاردەکەن، هاوکات داوای لە حزبوڵڵای لوبنان و هێزە چەکدارەکانی عێراق کردووە، هەموو جموجۆڵەکانیان ڕابگرن تا ئەو کاتەی بابەتی سیخوری و دزەکردنی زانیارییەکان بۆ ئیسڕائیل یەکلا دەبێتەوە.