چوارچێوەی هەماهەنگی ڕەوتەکەی سوودانی لە قاڵب دەدەن

ئاڤا نیوز

 

چوارچێوەی هەماهەنگی هەوڵەکانی بۆ لەقاڵبدانی ڕەوتی فوراتەین دەستپێکردووە، کە سوودانی سەرۆکایەتی دەکات، بۆ ئەوەی لە هەڵبژاردنەکانی داهاتوو دەنگی زۆر بەدەست نەهێنێت.

 

زانیاریی بەدەستهاتوو: بەگوتەی چەند سەرچاوەیەک بۆ ڕۆژنامەی شەرقولئەوسەت، چەند لایەنێکی چوارچێوەی هەماهەنگی پێشنیازیان کردووە دوو بڕگەی یاسای هەڵبژاردن هەموار بکرێت، ئەوەش سوودانی نیگەران کردووە؛ کە بریتین لە:

• گەڕانەوە بۆ فرە بازنەیی، بۆ ئەوەی سوودانی نەتوانێت زۆرترین دەنگ بەدەست بهێنێت.

• هەر بەرپرسێکی دەوڵەت، ئەگەر بیەوێت بەشداریی هەڵبژاردن بکات دەبێت شەش مانگ پێشتر واز لە پۆستەکەی بێنێت.

لێدوانی فەرمی: محەمەد سەیهود ئەندامی پەرلەمانی عێراق و ئامۆزای سوودانی ڕایگەیاندووە: سەرکردەکانی چوارچێوەی هەماهەنگی داوایان لێکردووە، بە سوودانی بڵێت، کەمێک لەسەرخۆ بێت، چونکە ئەوەی دەیکات بووەتە هۆی شەرمەزاری ئەوان. 

لەلایەکی دیکەوە: بەها ئەعرەجی جێگری پێشووی سەرۆکوەزیرانی عێراق دەڵێت: سەرکردەکانی چوارچێوەی هەماهەنگی بە سوودانیان گوتووە، پشتیوانی دەکەن بۆ ئەوەی خولێکی دیکە ببێتەوە بە سەرۆکوەزیران، بەمەرجێک بەشداریی هەڵبژاردنەکانی داهاتووی پەرلەمانی عێراق نەکات.