ئاڤا زانیاری لەبارەی دەستپێکردنەوەی گەشتە ئاسمانییەکانی نێوان هەولێر و دیمەشق ئاشکرا دەکات

ئاڤا نیوز

 

بەمەبەستی دەستپێکردنەوەی گەشتە ئاسمانییەکان، عێراق گفتوگۆکانی لەگەڵ سووریا چڕ کردووەتەوە، چاوەڕوان دەکرێت لە ئایندەیەکی نزیکدا گەشتەکان دەستپێبکەنەوە.

 

وێنە گەورەکە: لەگەڵ ڕووخانی ڕژێمی بەشار ئەسەددا، بەشێک لە وڵاتانی ناوچەکە و جیهان گەشتە ئاسمانییەکانیان لەگەڵ دیمەشق ڕاگرت، ئاڤا بەدواداچوونی بۆ دەستپێکردنەوەی گەشتەکانی هەرێمی کوردستان و عێراق لەگەڵ سووریا کردووە.

 

لێدوانی فەرمی: ئەحمەد وشیار، بەڕێوەبەری فڕۆکەخانەی نێودەوڵەتی هەولێر، بە ئاڤا میدیای ڕاگەیاند:

 

- بۆ دەستپێکردنەوەی گەشتەکان لەگەڵ دیمەشق، ئێمە چاوەڕوانی دەسەڵاتی شارستانی فڕۆکەوانی عێراقی دەکەین، چونکە ئەوان بڕیار لەوبارەیەوە دەدەن.

 

-  ئێستا کۆبوونەوە لەنێوان دەستەی فڕۆکەوانی عێراقی و دەستەی فڕۆکەوانی سووریا هەیە، بۆ ئەوەی گەشتەکانی نێوان هەردوولا دەستپێبکاتەوە.

 

باکگراوند: دوای کەوتنی ڕژێمی بەشار ئەسەد گەشتە ئاسمانییەکانی عێراق و هەرێمی کوردستانیش لەگەڵ ئەو وڵاتە ڕاگیران، بەڵام ڕۆژی 7-1-2025 جارێکی دیکە ئیمارات گەشتەکانی دەستپێکردەوە، سبەی پێنجشەممەش قەتەر گەشتەکانی بۆ سووریا دەستپێدەکاتەوە.