بەریتانیا دوو سزای نوێ بەسەر قاچاخچی کۆچبەراندا دەسەپێنێت

ئاڤا نیوز 

 

حکومەتی بەریتانیا داوا دەکات وەک "تۆڕی تیرۆر" مامەڵە لەگەڵ قاچاخچی کۆچبەران و ئەوانەدا بکرێت کە بازرگانی بە مرۆڤەوە دەکەن، هاوکات لەندەن بڕیاریشی داوە سزای وەک "قەدەغەی گەشتکردن و سڕکردنی سامان" بەسەر ئەو کەسانەدا بسەپێنێت.

 

وێنە گەورەکە: حکومەتی نوێی بەریتانیا کە لە مانگی تەمموزی ساڵی ڕابردووەوە هەڵبژێردراوە، بەڵێنی داوە ڕووبەڕووی ئەو قاچاخچییانە ببێتەوە کە بە ڕێگەی بەلەم و لە کەناڵی ئینگلیزەوە ساڵانە هەزاران کۆچبەر ڕەوانەی وڵاتەکەی دەکەن، لە یەکەم هەنگاویشدا هەموو ئەوانەی لەو بابەتە تێوەدەگلێن، دەیەوێت سامانەکانیان لە بەریتانیا سڕبکات.

 

 

لێدوانی فەرمی: کیێر ستارمەر، سەرۆکوەزیرانی بەریتانیا ڕایگەیاند: قەدەغەی گەشتکردن و سڕکردنی سامان ئەو دوو ڕێکارەن حکومەت دژی تۆڕەکانی بازرگانی بە مرۆڤ دەیگرێتەبەر، چونکە ئەو تۆڕانە هەڕەشەن بۆسەر ئاسایشی جیهانی و پێویستە وەک تۆڕی تیرۆر مامەڵەیان لەگەڵدا بکرێت.

 

لەلایەکی دیکەوە: حکومەتی بەریتانیا دەڵێت، سزا نوێیەکان کە پێویستی بە ڕەزامەندی پەرلەمانی وڵاتەکەش هەیە، لە ماوەی ساڵێکدا دەکەونە بواری جێبەجێکردنەوە.