ناحيه‌ى ڕۆڤيا.. لە پرۆژەیەكی شوێنەواریدا جۆرە گۆزەیەكی تەمەن 8 هەزار ساڵ دۆزرایەوە

ئاڤا نیوز

 

لە هەردوو پرۆژەی شوێنەواری لە گرێ ئاسنگەران و كانی ئەسپەهان، لە سنووری ناحیەی ڕۆڤیاى سەر بەقەزای بەردەرەش دوو شوێنی نیشتەجێبوونی مرۆڤ، و گۆزەی تەمەن هه‌شت هەزار ساڵان دۆزرانەوە.

 

وێنە گەورەکە: پرۆژەی هەڵكۆڵین لە شوێنەواری گرێ ئاسنگەران بە هاوبەشی بەڕێوەبەرایەتیی شوێنەوار و كەلەپووری دهۆك و بەڕێوەبەرایەتیی گشتیی شوێنەوار و كەلەپووری سەر بە وەزارەتی شارەوانی و گەشتوگوزار، لەگەڵ زانكۆی ئۆدینەی ئیتاڵی جێبەجێ دەكرێت.

 

ڕاگەیێندراوی فەرمی: وەزارەتی شارەوانی و گەشتوگوزار دەلێت: تەمەنی گۆزەکە بۆ هەشت هەزار ساڵ پێش ئێستا دەگەڕێتەوە کە بۆ بەکارهێنان و خاوێنكردنەوەی "گەنم" بەکارهاتووە. هەروەها لە پرۆژەی شوێنەواری "گرێ ئاسنگەران"يش، دوو ژووری نیشتەجێبوونی مرۆڤ دۆزرانەوە كە شێوەیان لاكێشەیین و لە كەرپووچ و لەسەر بەرزایيی گردەكە دروست كراون.

 

زانیاریی زیاتر: بەپێی ئەو توێژینەوە شوێنەوارییانەی بۆ هەردوو پرۆژەكە كراون، ئەو دۆزینەوانە ئەوە دەسەلمێنن كە هەزاران ساڵ پێش ئێستا، ژیانی مرۆڤ لەو سنوورەدا هەبووە و بەردەوام گۆڕانكاری بەسەردا هاتووە، بە تایبەتی لە كۆمەڵگەی كشتوكاڵییەوە بۆ كۆمەڵگەی كۆمەڵایەتی و دواتر بەرەو پەرەسەندنی زیاتر و مۆدێرن و بەردەوامبوونی ژیان لە سنوورەكەدا.