نزیكەی 47%ـی بەندکراوانی عێراق دووچاری نەخۆشیی دەروونی هاتوون

ئاڤا نیوز

 

تۆڕی عەدالە بۆ چاودێری ڕەوشی گرتووخانەكانی عێراق ئاشكرای دەكات، بەپێی ڕاپرسییەک لە 14 گرتووخانە و بەڕێوەبەرایەتییەكانی چاكسازیی عێراق، دەركەوتووە 47%ـی بەشداربووانی ڕاپرسیەكە دۆخی دەروونییان باش نییە یاخود بەجۆرێك لە جۆرەكان، نەخۆشیی دەروونیان هەیە.

 

وێنە گەورەكە: لە عێراق، 27 گرتووخانە و بەڕێوەبەرایەتیی چاكسازی هەن كە 16ـەیان سەر بە وەزارەتی دادن و سێشیان سەر بە وەزارەتی ناوخۆ  و دەزگا سەربازییەكانن، هەشت گرتووخانەی چاكسازیش سەر بە وەزارەتی كار و كاروباری كۆمەڵایەتین. ڕاپۆرتە مەیدانییەكانی تۆڕی عەدالە بۆ چاودێری ڕەوشی گرتووخانەكانی عێراق، ئاماژە بەوە دەكەن بە گشتی دۆخی گرتووخانەكانی عێراق بەراورد بە پێوەرە جیهانییەكانی مافی گیراوان و حكومدراوان لە سەرجەم لایەنەكانەوە گرفتی هەیە.

 

ڕاگەیێنراوی فەرمی: تۆڕی عەدالە بۆ چاودێری ڕەوشی گرتووخانەكان لە ڕاپۆرتێكدا ڕایدەگەیەنێت:

- بنكەی تەندروستیی نێو چاكسازییەكان پشكنینی مانگانەیان بۆ 67%ـی كۆی بەندكراوان ئەنجامداوە و 33%ـی گیراوان پشكنینیان بۆ ئەنجام نادرێت.

 

- لە هەر گرتووخانەیەك لانیكەم 45 حاڵەتی نەخۆشی دەروونی هەیە كە بەشێكیان پێویستییان بە چارەسەری پزیشكی درێژخایەن هەیە.

- بەگوێرەی ڕاپرسییەكان كە لە 14 گرتووخانەی عێراق كراوە، دەركەوتووە 47%ـی بەندكراوان دووچاری یەكێك لە نەخۆشییە دەروونی، دەماری، عەقڵییەكان هاتوون.

 

زانیاریی زیاتر: باوترین نەخۆشی كە لەنێو گیراوان خێرا بڵاودەبێتەوە؛ نەخۆشییەكانی هەستیاریی پێستە كە نزیكەی سەرجەم بەندكراوان دووچاری ئەو نەخۆشییە هاتوون.

 

ئەوەی پێویستە بیزانیت: بەگوێرەی ماددەكانی 10 و 11 لە یاسای چاكسازیی ڕاگیراوان و بەندكراوان ژمارە 14ـی دەرچوو لە ساڵی 2018، هەموو بەندكراوێك مافی ئەوەی هەیە بەشێوەی ماوە ماوە پشكنینی پزیشكی و دەروونی بۆ بكرێت و لەڕووی چاودێریی كۆمەڵایەتییەوە بایەخی پێ بدرێت بە جۆرێك ماوەی نێوان هەر پشكنینێك و ئەوەی دیكە، لە 30 ڕۆژ زیاتر نەبێت.