ئەمریکا و بەریتانیا سزای نوێ بەسەر ڕووسیا دەسەپێنن

ئاڤا نیوز

ئەمریکا و بەریتانیا ڕایانگەیاند سزای نوێ بە سەر ڕووسیادا دەسەپێنن.
 
چیرۆکی سەرەکی: وەزارەتی گەنجینەی ئەمریکا ڕایگەیاند سزاکان کەرتی وزەی ڕووسیا بە ئامانج دەگرن و گەورە کۆمپانیای گازپڕۆمی ڕووسیاش و زیاتر لە 180 کەشتی ڕووسیا دەگرنەوە. ئەمەش لەبەر شەڕی ڕووسیا لە دژی ئۆکراینا.

 

زانیاریی زیاتر: دەرکردنی ئەم سزا نوێیانە لە کاتێکدایە کە تەنیا چەند ڕۆژێکی کەم لە ماوەی سەرۆکایەتییەکەی جۆ بایدن، سەرۆکی ئەمریکا ماوە و ڕۆژی 20ی کانوونی دووەم دۆناڵد ترەمپ وەک سەرۆکی ئەمریکا دەستبەکار دەبێت.

 

لەلایەکی دیکەوە: ترەمپ پێشتر ڕایەگیاندبوو کە ڤلادیمیر پووتین، سەرۆکی ڕووسیا، ویستی ئەوەی هەیە لەگەڵیدا کۆببێتەوە و ئەویش ئامادەکاریی بۆ ئەم کۆبوونەوەیە دەکات. ترەمپ چەند جارێک ئاماژەی بەوە داوە کە کار دەکات بۆ کۆتاییهێنان بە شەڕی نێوان ڕووسیا و ئۆکراینا. 

 

وردەکاریی سزاکان بەم شێوەیەیە:-

 

- سزا و ئابڵوقە بەسەر زیاتر لە 180 کەشتی نەوتگوێزەرەوە.
- سزای تەواوەتی بەسەر گازپڕۆمی ڕووسی.
- سزا بەسەر بازرگان و بەرپرسە ڕووسیەکان.
- سزای تەواوەتی بەسەر کۆمپانیای سورگوت نەفتەگازی ڕووسی.
- سزا بەسەر کۆمپانیاکانی دڵنیایی لە ڕووسیا کە بیمەی کۆمپانیاکانی وڵاتەکەیان دەکەن.
- سزا بەسەر ئەو کەس و لایەنانی سەرقاڵی بەرھەمھێنان و ھەناردەکردنی گازی سروشتی ڕووسیان.
- سزا بەسەر ئەو کەس و لایەنانەی ھەوڵی فراوانکردنی بەرھەمھێنانی  نەوتی ڕووسیا دەدەن.
- سزا بەسەر ئەوانەی ھەوڵی پشتگیری لە پرۆژەی جەمسەری باکور دەدەن.
- سزا بەسەر ئەوانەی بەشدارن لە کەرتی کانزا و وەبەرھێنانی لە ڕووسیا.
- سزا بەسەر بەرپرسانی باڵای کۆمپانیای وزەی ئەتۆمی ڕۆستام.

 

ئەوەی پێویستە بیزانیت: لە ڕاگەیێنراوەکەدا ھاتووە؛ بەریتانیا ھاوڕایە لەگەڵمان لە سزاکان بۆ سەر کەرتی وزەی ڕووسیا و ھاوسۆزین لەگەڵ ئۆکراینا و پاڵپشتییان دەکەین لە بەرگریکردنیان لە زێدی خۆیان لەگەڵ ڕووسیا.