بەرپرسێکی پێشووی کەرکووک لە تورکیاوە ڕادەستی عێراق دەکرێتەوە

ئاڤا نیوز

 

دەستەی دەستپاکیی عێراق وەرگرتنەوە بەرپرسێکی پێشووی لە سایلۆی کەرکووک لەلایەن تورکیاوە ڕاگەیاند کە تۆمەتبارە بە چەند دۆسییەیەکی گەندەڵییەوە.

 

وێنە گەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات.

 

ڕاگەیێنراوی فەرمی: دەستەی دەستپاکیی عێراق ڕایگەیاند: سەمیر یونس شوکر، یەکێک لەو بەرپرسانەی کە لە سایلۆی کەرکووک کاری دەکرد و بە دۆسیەی گەندەڵی تۆمەتبارکراوە، لەلایەن دەسەڵاتدارانی تورکیاوە ڕادەستی عێراق کرایەوە.

 

- تۆمەتبارەکە کاتێک ئەندامی لیژنەی خەرجکردنی چەک بووە لە سایلۆکە، بڕە پارە و پێشینەی چەکەکانی سەر بە یەکێک لە سکاڵاکاران بۆ بەهای بەبازاڕکردنی گەنمەکەی بەبێ ڕەزامەندی کەسەکە بۆ یەکێک لە تۆمەتبارەکان خەرجکردووە.

 

- ستایشی هەماهەنگی بەرزی نێوان بەشی هەماهەنگی وەزارەتی ناوخۆی فیدراڵ لە هەرێمی کوردستان لەگەڵ دەزگای گشتی ئاسایشی هەرێمی کوردستان دەکەین لە وەرگرتنی تۆمەتبارەکە لە ڕێگەی دەروازەی ئیبراهیم خەلیلەوە تا گواستنەوەی بۆ دادگای سەرەتایی کەرکووک.

 

- پێشتر دادگای تاوانەکانی کەرکوک دوو بڕیاری غیابی بە گوێرەی ماددەکانی 340 و 331 لە یاسای سزادانی عێراقی، سزای هەشت ساڵ زیندانی بەسەر بەسەر تۆمەتبارەکەدا سەپاندبوو.