دانا ئەحمەد مەجید: دەبێت هەمووان ببینە هێزی فشار لەسەر بەغدا

ئاڤا نیوز

 

ڕێکخەری بزووتنەوەی گۆڕان باس لەوە دەکات، کە هەڵوێستی بزووتنەوەی گۆڕان لەبارەی پێویستی کاری پێکەوەیی و یەکگرتوویی و یەک گوتاری کوردستان لە بەغدا نەگۆڕە. هاوکات دەڵێت، دەبێت هەمووان بۆ بەرگریکردن لە پێناو مافە دەستوورییەکانی خەڵکی کوردستان ببینە هێزی فشار و داکۆکیکار بۆ سەر بەغدا. 

 

وێنە گەورەکە: سەرەڕای ئاڵۆزییەکانی ناوچەکە و ئەو دۆخەی لە ڕۆژهەڵاتی ناوەڕاست هاتووتە ئاراوە، عێراق لە پێشێلکردنی مافە دەستوورییەکانی هەرێمی کوردستان و سزادانی خەڵکەکەی بەردەوامە. گۆڕانیش وەک هێزێکی سیاسی هەرێمی کوردستان هەڵوێستی خۆی دەربڕی و لە پێناو پێناو مافە دەستوورییەکانی خەڵکی کوردستان داوای فشار دروستکردن بۆ سەر بەغدا دەکات.

 

لێدوانی فەرمی: دانا ئەحمەد مەجید، ڕێکخەری بزووتنەوەی گۆڕان، بە ئاڤا میدیای ڕاگەیاند: 

 

- بزوتنەوەی گۆڕان لەبارەی پێویستی کاری پێکەوەیی و یەکگرتویی و یەکگوتاری کوردستانی لە بەغدا، بە ئامانجی دەستەبەرکردنی شایستە داراییەکانی هەرێمی کوردستان، لەسەر هەموویانەوە دابینکردنی موچەی موچەخۆران، هەڵوێستی نەگۆڕە. 

 

- پێویستە هەمووان پێکەوە لە بەغدا ببنە هێزی فشار، بۆ بەرگریکردن لە مافە دەستوورییەکانی خەڵکی کوردستان.

 

- ئێمە بڕوامان وایە جیاوازییەکانمان و کێبڕکێی سیاسیی لەناوخۆی هەرێمی کوردستان نەبەینە بەغدا، بەڵکو لە بەغدا هەمووان بەیەکەوە ببینە هێزی فشار و داکۆکیکار، بۆ بەرگریکردن لە مافە دەستورییەکانی خەڵکی کوردستان، ئەم یەکگرتوییەش نەک تەنیا بۆ مووچە، بەڵکو بۆ چارەسەرکردنی کێشە هەڵپەسێردراوەکانی مادەی 140 و یاسای نەوت و گاز و پشکی کورد لە سیستمی بەرگریی عێراقی و بابەتە داراییەکان پێویستی قۆناغەکەیە.