ئاڤا میدیا بەدواداچوون بۆ کێشەی چەکی پارەی بەڵێندەران دەکات

ئاڤا نیوز

 

نزیکەی هەزار هاونیشتمانی چەکی پارەیان لە بەڵێندەران کڕیووە، بەڵام تاوەکو ئێستا پارەکانیان وەرنەگرتووە، خاوەنی ئەو چەکە بانکییانە داوا دەکەن ئاڤا میدیا بەدواداچوونیان بۆ بکات.

 

وێنە گەورەکە: نزیکەی هەزار هاونیشتمانی لە ساڵانی 2014 و 2015 چەکی پارەیان لە ئەو بەڵێندەرانە کڕیوە کە پارەیان لای حکومەت بووە، چەکەکانیش مامەڵەی کڕین و فرۆشتنیان پێوەکراوە و دەستاودەستیان کردووە، بەڵام تاوەکو ئێستا ئەو چەکانە لەلایەن بانکەکانەوە پارەکانیان خەرج نەکراوە، ئەو خاوەن چەکانەش داوایان لە ئاڤا کرد، بەدواداچوون بۆ کێشەکەیان بکات.

 

لێدوانی فەرمی: سارن یوسف، هاونیشتمانییەکی مەسیحییە بە ئاڤا میدیای ڕاگەیاند:

 

- قەرزم لای بەڵێندەرێک بوو ئەویش پارەی لای حکومەت بوو، پارەی کاشی نەبوو بۆم بگەڕێنێتەوە، بۆیە چەکێکی 58 ملیۆن دیناری پێدام کە لە پارەکەی خۆم زیاتر بوو، چەکەکەم بردە بانکی عەنکاوە و وتیان گرفتی نییە و پارەکەی حەواڵەکراوە، بەڵام ئێستا لەبەر قەیرانی دارایی ناتوانیت پارەکەت ڕابکێشیت.

- لە بانکەکە بەڵێننامەیەکیان پێ پڕکردینەوە و وتیان پارەکەتان نافەوتێت دوای یەک دوو مانگی دیکە دەتوانن پارەکەتان ڕابکێشن، ئەوە 10 ساڵ تێدەپەڕێت و پارەکەمان خەرج نەکراوە، دەفتەر چەکم هەیە و بانکەکەش چەکەکەی قبوڵ کردووە، داوا لە حکومەت دەکەین پارەکەمان بۆ خەرج بکات، جا هەمووی پێکەوە بێت یان مانگانە بەشێک لە پارەکە بێت ڕازین.

لەلایەکی دیکەوە: بەپێی بە دواداچوونەکانی ئاڤا لە وەزارەتی دارایی، سەرچاوەیەکی باڵا وتی: ئەم بابەتە پەیوەندی بە بڕیاری ئەنجوومەنی وەزیرانەوە هەیە و دەبێ چاوەڕێ بکرێت تاوەکو بڕیارێک دەردەچێت.

ئەمەش بزانە: هەر لە بەدواداچوونەکەی ئاڤا میدیا دەرکەوتووە، هۆکارێکی سەرەکی ئەم کێشەیە بۆ خەڵکەکە دەگەڕێتەوە، لەبەرئەوەی سەدان هاووڵاتی موڵک و ماڵی خۆیان بۆ کڕینی ئەو چەکانە فرۆشتووە، بەڵام تاوەکو ئێستا ئەو چەکانە لە بانکەکان خەرج ناکرێن.