لە گەرمیان و سۆران و ڕاپەڕین دابەشکردنی زەوی دەستپێدەکات

ئاڤا نیوز

 

پرۆسەی دابەشکردنی زەوی لە ناوچە جیاوازەکانی هەرێمی کوردستان دەستپێدەکات، فەرمانبەر و خانەنشینانی سێ ئیدارەی سەربەخۆ لە پرۆسەکە سوودمەند دەبن و لە چەند ڕۆژی داهاتوو تیروپشکی وەرگرتنی زەوییان بۆ دەکرێت.

 

وێنە گەورەکە: لە کۆتاییەکانی ساڵی 2024 پرۆسەی دابەشکردنی زەوی لە چەند ناوچەیەکی هەرێمی کوردستان دەستیپێکرد و زیاتر لە 10 هەزار پارچە زەوی دابەشکرا، لەم قۆناغەشدا پرۆسەی دابەشکردنی زەوی لە ئیدارە سەربەخۆکان دەستپێدەکات و فەرمانبەر و خانەنشینانی سۆران، گەرمیان و ڕاپەرین لە پرۆسەکە سوودمەند دەبن.

 

لێدوانە فەرمییەکان: 

گەرمیان: دڵشاد فەتاح، جێگری بەڕێوەبەری گشتیی شارەوانییەکانی گەرمیان بە ئاڤا میدیای ڕاگەیاند، "ڕەزامەندی دوو هەزار و 400 کەس گەڕاوەتەوە و زەوییەکان ئامادەن و لە پرۆسەی وردبینیکردنداین، ئەم مانگە دەست بە ئەنجامدانی تیروپشک بۆ زەوییەکان دەکەین".

ڕاپەڕین: ئاوارە کوێخا عەلی، بەڕێوەبەری گشتیی شارەوانییەکانی ڕاپەرین بە ئاڤای ڕاگەیاند، "هەفتەی داهاتوو پرۆسەی دابەشکردنی زەوی لە سنوورەکە دەستپێدەکات و سێ بۆ چوار هەزار پارچە زەوی دابەشدەکرێت".

سۆران: خەسرەو ئیسماعیل، بەڕێوەبەری گشتیی شارەوانییەکانی سۆران بە ئاڤا میدیای ڕاگەیاند، "ناوی فەرمانبەران و خانەنشینانی سنووری ئیدارەی سەربەخۆی سۆران لە ئەنجوومەنی وەزیرانن، لێرە هەموو ڕێکارەکان تەواوکراون دوای وەرگرتنی ڕەزامەندی تیروپشک بۆ دابەشکردنی زەوییەکان دەکرێت".