ساڵێک بەسەر بە ئامانجگرتنی ماڵی پێشڕەو دزەیی تێدەپەڕێت

ئاڤا نیوز

 

ساڵێک پێش ئێستا هەولێر شەوێکی ناخۆشی بەڕێ کرد، بەهۆی هێرشی مووشەکی بۆ سەر ماڵی یەکێک لە سەرمایەدارەکانی کوردستان، کە دەرئەنجامەکەی گیانلەدەستدانی چوار کەس و برینداربوونی شەشی دیکە بوو.

 

چیرۆکی سەرەکی: كاتژمێر 11:30ـی شەوی 15ـی کانونی دووەمی ساڵی 2024، سوپای پاسدارانی ئێران بە مووشەکی بالیستی ماڵی سەرمایەدار پێشڕەو دزەیی بە بیانووی "بوونی بارەگای بنکەی مۆساد" کردە ئامانج، بەڵام ئەو هێرشە شەهیدبوونی خاوەن ماڵ، ژینا کچە 11 مانگەکەی، میوان و کارگوزارێکی لێکەوتەوە، کە هەموویان خەڵکی مەدەنی بوون.

 

زانیاریی بەدەستهاتوو: لە ساڵیادی شەهیدبوونی پێشڕەو دزەیی و کچە 11 مانگەکەیدا، بڕیارە ئەمڕۆ لە پڕۆژەی ئێمپایەر لە شاری هەولێر یادی ئەو ڕووداوە بکرێتەوە.

 

ئەوەی پێویستە بیزانیت: ئەم ڕووداوە جیهانی هێنایە دەنگ و لە بەشێکی وڵاتان بەتووندی سەرکۆنەی هێرشەكەیان کرد، بیانووی سوپای پاسدارانی ئێران بۆ ئەو هێرشە بوونی بنکەی دەزگای هەواڵگری مۆساد بوو، کە دواتر لە لێکۆڵینەوەکانی دەزگای ئاسایشی نیشتمانی عێراق دەرکەوت هیچ دەزگایەکی هەواڵگری بوونی نەبووە.