ژینگەی زیقار بۆ ئاڤا: 80%ـی شوێنەکانی کۆکردنەوەی خۆڵ و خاشاک نایاسایین

ئاڤا نیوز

 

فەرمانگەی ژینگەی پارێزگای زیقار دەڵێت، 80%ـی شوێنەکانی کۆکردنەوەی خۆڵ و خاشاک نایاسایین مۆڵەتی ژینگەیان نییە، جەختیش دەکاتەوە کە بڕیارەکانی وەزارەتەکەیان بۆ داخستنی ئەو شوێنانە جێبەجێ نەکراون.

 

لێدوانی فەرمی: مۆفەق تائی، بەڕێوەبەری ژینگەی پارێزگای زیقار لە باشووری عێراق بە ئاڤا میدیای ڕاگەیاند: 

 

- لەکۆی 16 شوێنی کۆکردنەوەی خۆڵ و خاشاک، 13 شوێنیان مۆڵەتی ژینگەیان نییە و ئاگادار کردنەوەیان پێدراوە، بەگوێرەی ڕێکارەکانیش لە قۆناغی دووەمدا پێبژاردن و دواتریش بە بڕیاری وەزیری ژینگە، ئەو شوێنانە دادەخرێن.

 

- یەکێک لە کێشەکانیان ئەوەیە بڕیاری وەزیری ژینگە بۆ داخستنی شوێنی کۆکردنەوەی خۆڵ و خاشاک لە ناسرییە کە ساڵی 2019 دەرچووە، لەلایەن شارەوانییەوە جێبەجێ نەکراوە، بۆیە ئێستا دۆسییەکەیان بردووەتە دادگا و داوایان کردووە لێپرسینەوە لە سەرپێچیکاران بکرێت.

 

ئەوەی پێویستە بیزانیت: بەگوێرەی ئاماری ڕوانگەی عێراقی سەوز 72%ـی هەموو شوێنەکانی کۆکردنەوەی خۆڵ و خاشاک لە عێراق ڕێکاری نایاسایی بۆ ڕزگاربوون لە خاشاک بەکاردەهێنن، هاوکات تەنیا 16%ـی ئەو شوێنانە مۆڵەتی ژینگەیان هەیە.