چوار ڕێگەی نێوان هەولێر و سلێمانی بەڕووی بارهەڵگران دادەخرێت

ئاڤا نیوز

 

دانیشتووانی چوار ناوچەی سنووری نێوان سلێمانی و هەولێر گردبوونەتەوە و ڕێگە نادەن شوفێری بارهەڵگرەکان بارەکانیان لەنێوان هەولێر و سلێمانی ئاڵوگۆڕ بکەن، بەشێکی دانیشتووانی ئەو ناوچانە لەگەڵ سەرۆکی یەکەی ئیداری  لە گفتوگۆدان بۆ گەیشتن بە چارەسەرێک.

 

چیرۆکی سەرەکی: ناوچەکانی خدران، بنگرد، کانی وەتمان و تەق تەق ڕێگەیان بەڕووی تێپەڕبوونی بارهەڵگری نەوت، کانزا و کاڵاکانی دیکە داخستووە پێداگرن لەسەر ئەوەی نابێت بارهەڵگران بەوێدا بارەکانیان بگوازنەوە و لەنێوان پارێزگاکاندا ئاڵوگۆڕی بکەن.

 

وێنە گەورەکە: ئەو ڕێگەیانە چوار هێڵی سەرەکی هەولێر، ڕانیە، کۆیە و سلێمانی بەیەکەوە دەبەستێتەوە ناوەندێکی گرنگی بازرگانییە لەنێوان پارێزگاکانی هەولێر، سلێمانی و پارێزگاکانی دیکەی هەرێمی کوردستان و عێراق، ماوە ماوە بەهۆی خراپی ڕێگەکان دانیشتووانی ئەو ناوچانە ڕێگە بەڕووی تێپەڕبوونی بارگەڵگرەکان دادەخەن.

 

زانیاریی تایبەت: ئاڤا زانیویەتی بەرپرسانی یەکەی ئیداری ناوچەکە لەگەڵ ژمارەیەکی زۆر لە دانیشتووانی ناوچەکە لەکۆبوونەوەدان بۆ ئەوەی بگەنە چارەسەرێک و ڕێگەکان بکەنەوە، تاوەکو ئەم ساتە دانیشتووانی پێداگرن لەسەر داخستنی ڕێگەکان.