حەماس و ئیسرائیل لەسەر ئاگربەست ڕێککەوتن

ئاڤا نیوز

بزووتنەوەی حەماس و ئیسرائیل لەسەر ڕاگەیاندنی ئاگربەست لە غەززە و گۆڕینەوەی دیلەکان ڕێککەوتن، لە چەند کاتژمێری دهاتوودا ڕادەگەیێنرێ و لە ڕۆژانی دهاتوودا جێبەجێ دەکرێت. شەڕ ڕادەگیرێ و بەرامبەر هەر سەربازێکی ئیسرائیل 50  فەڵەستینی و، بەرامبەر هەر بارمتەیەکیی ئیسرائیلیش 33 هاووڵاتی فەڵەستینی ئازاد دەکرێن.

وێنە گەورەکە: ساڵێک و سێ مانگە شەڕ لە غەززە هەڵگیرساوە، بە نێوەندگیری ئەمریکا و میسر و قەتەر دوای چەندین مانگ گفتوگۆ حەماس و ئیسرائیل گەیشتوونەتە ڕێککەوتن، ڕێککەوتنە سێ قۆناغ لەخۆدەگرێت، هەر قۆناغێکیش 42 ڕۆژ دەخایەنێت.

قۆناغی یەکەم: ڕێککەوتنەکە پێی دەگوترێت "قۆناغی مرۆیی"، چاوەڕوان دەکرێت 33 دەستگیرکراوی ئیسرائیلی زیندوو و مردوو ئازاد بکرێن، ژن و بەتەمەن و نەخۆش لەخۆ دەگرێت، لەبەرامبەر ئەوەشدا سوپای ئیسرائیل لە زۆربەی ناوچەکانی غەززە دەکشێتەوە.

ئازادکردنی یەکەم پۆلی زیندانیانی ئیسرائیلی له قۆناغی یەکەمدا له ڕۆژی حەوتەمی ئاگربەست دەبێت، لە بەرامبەر هەر سەربازێکی ئیسرائیلی، 50 دەستگیرکراوی فەڵەستینی ئازاد دەکرێن کە 30 کەسیان بە زیندانی هەتاهەتایی و 20 یان بە زیندانی درێژخایەن سزادراون.

بۆ هەر بارمتەیەکی مرۆیی، واتە بەرامبەر هە ژنێک یان بەساڵاچووێکی ئیسرائیلی، 30 دەستگیرکراوی فەڵەستینی لە چین و توێژە جۆراوجۆرەکان، لەوانە مێردمنداڵ، نەخۆش و ژن ئازاد دەکرێن.

قۆناغی دووەم: 16 ڕۆژ دوای دەستپێکردنی ئاگربەست دەستپێدەکات، تیشک دەخاتە سەر گفتوگۆکردن لەسەر ڕێکەوتنێکی گشتگیر بۆ سەرجەم زیندانییەکان لە غەززە و ئازادکردنی ئەو گەنج و سەربازانەی ماونەتەوە. مەرجە ڕێککەوتن لەسەر قۆناغی دووەم تاوەکو پێنج هەفتە دوای ڕاگەیاندنی ئاگربەست بکرێت.

قۆناغی سێیەم: ڕێکخستن و پلانی درێژخایەن بۆ ئاوەدانکردنەوەی غەززە دەگرێتەوە. کەناڵی 13ی ئیسرائیل بڵاویکردووەتەوە، ئێوارەی ئەمڕۆ بنیامین ناتانیاهۆ گفتوگۆی خێرا لەگەڵ شاندی ئیسرائیل لە قەتەر و هاوکات سەرۆکی دەزگا ئەمنییەکان دەکات.

کەناڵی 12٢ی ئیسرائیلیش بڵاویکردووەتەوە، حکومەتی ئیسرائیل سبەی پێنجشەممە کۆبوونەوەیەک دەکات بۆ پەسەندکردنی ئاگربەست، لەکاتێکدا پێشبینی دەکرێت جێبەجێکردنی ئاگربەست و ڕێککەوتنەکە بکەوێتە یەکشەممەی داهاتوو.

سەرچاوەیەکی فەلەستینیشیش بە کەناڵی کان-ی ئیسرائیلی ڕاگەیاندووە،  پێدەچێت تا سبەی پێنجشەممە ئاگربەست واژۆ بکرێت و لە ماوەی ڕۆژێک یان دوو ڕۆژدا جێبەجێ بکرێت.

لەلایەکی دیکە: نووسینگەی بنیامین نەتانیاهۆ، سەرۆکوەزیرانی ئیسرائیل ڕایدەگەیێنێ، هێشتا ڕێککەوتنی کۆتایی لەبارەی ئاگربەست و ئازادکردنی دیلەکان لەنێوان ئیسرائیل و حەماس نەکراوە.