وتەبێژی حکومەت: ڕێككەوتنی سوودانی و كۆمپانیای بی پی پێشێلكاریی دەستوورە

ئاڤا نیوز

وتەبێژی حكومەتی هەرێمی كوردستان ڕێككەوتنی نێوان محەممەد شیاع سوودانی، سەرۆكوەزیرانی عێراق و كۆمپانیای بی پیی بەڕیتانی سەبارەت بە نەوتی كەركووك بە پێشێلكاریی دەستوور وەسف دەكات و دەڵێ دەبوو هەرێمی كوردستانیش لایەنێك بێت لە ڕێككەوتنەكە.

 

چیرۆکی سەرەکی: بەگوێرەی نووسینگەی ڕاگەیاندنی محەممەد شیاع سوودانی، سەرۆکوەزیرانی عێراق،ڕۆژی سێشەممە 14-1-2025 لە لەندەن، بە ئامادەبوونی حەییان عەبدولغەنی، وەزیری نەوت یاداشتی لێکتێگەیشتن لەنێوان حکومەتی عێراق و کۆمپانیای بریتیش پیترۆلیۆم (بی پی) واژۆ کرا سەبارەت بە بەرنامەیەک بۆ هەڵسەنگاندنی ئەگەری گەشەپێدانی تەواوی هەر چوار کێڵگە نەوتییەکانی پارێزگای کەرکووک، ئەمە ناڕەزایی حكومەتی هەرێمی كوردستانی لێكەوتەوە.

 

لێدوانی فەرمی: پێشەوا هەورامانی سەبارەت بە ئەوەی كونسوڵ و نوێنەری وڵاتان هیچ بەڵێنێكیان بە شاندی باڵای هەرێمی كوردستانداوە، بە ئاڤا میدیای ڕاگەیاند: بەگشتی ئەوان لەو كۆبوونەوانەدا گوێ دەگرن و ڕاپۆرتی خۆیان دەنووسن و پاشان دەیدەنە باڵیۆزخانەکانیان لە بەغدا، بۆ ئەوەی باڵیۆزخانەكان پەیامەكانی هەرێمی كوردستان بگەیێننە حكومەتی عێراق.

 

 

پێشەوا هەورامانی گووتیشی:

- كونسوڵ و نوێنەری وڵاتان لە هەرێمی كوردستان تێگەیشتنی تەواویان هەیە بۆ دۆخی ئێستای هەرێمی كوردستان و گرفتەكانی نێوان هەولێر و بەغدا.

 

- ئامادەكاریی كراوە بۆ ئەوەی پێش 20ی مانگ لیستی مووچەی مانگی یەكی فەرمانبەرانی هەرێمی كوردستان بۆ بەغدا بنێردرێت.

 

- ئەوەی كە دەگوترێت شاندێكی باڵای هەرێمی كوردستان دەچێتە بەغدا تەنیا دەنگۆیە.

 

- دەبوو هەرێمی كوردستان لایەنێك بێت لە ڕێككەوتنی نێوان محەممەد شیاع سوودانی و كۆمپانیای بی پی بەڕیتانی، ئەمەش یەكێكی دیكەیە لەو پێشێلكارییە دەستووریانەی كە بەرامبەر هەرێمی كوردستان كرا، كارەكە بەبێ گەڕانەوە بۆ هەرێمی كوردستان كرا، بەپێی ماددەی 140 ئەم ناوچانە ناوچەی جێناكۆك و كێشە لەسەرن، دەستوور ئەمەی یەكلاكردووەتەوە كە هیچ لایەنێك بۆی نییە بە شێوەیەكی سەربەخۆ گرێبەستی نەوتی تێیاندا ئەنجام بدات، بەڵام كە كرا ئەمەش پێشێلكارییەكی دیكەی دەستوورییە.