گومرگی عێراق: ساڵی ڕابردوو داهاتمان زیاتر بووە لە دوو تریلیۆن دینار

عێراق

 

دەستەی گشتیی گومرگی عێراق ڕایدەگەیێنێ، لە ساڵی 2024  داهاتیان زیاتر بووە لە دوو تریلیۆن دینار و پێشبینی ئەوەش دەکات لەمساڵدا داهات زیاتر بێت.

 

وێنە گەورەکە: عێراق لە سەرەتای ئەمساڵەوە دەستیکردووە بە کارکردن بە سیستمی ئەلیکترۆنی لە دەروازە سنوورییەکانی بە مەبەستی کەمکردنەوەی بەربەستە بیرۆکراتیەکان لەگەڵ دامەزراندنی حوکمڕانی باش و بەرەنگاربوونەوەی گەندەڵی.

 

لێدوانی فەرمی: حەسەن عەکیلی، سەرۆکی دەستەکە لە لێدوانێکیدا بۆ ئاژانسی فەرمی عێراق ڕایگەیاند: "داهاتی دەستەکەمان بۆ ساڵی 2024 گەیشتووەتە دوو تریلیۆن و 131 ملیار دینار و پێشبینی دەکرێت لە ساڵی 2025 ئەم ژمارەیە بەرز ببێتەوە".

 

لە هەمان کاتدا: عەکیلی ئاماژەی بەوەدا، دەستەی گومرگ کار بۆ تەواوکردنی جێبەجێکردنی سیستمی ئەلیکترۆنی و فراوانکردنی دەکات بۆ ئەوەی هەموو ناوەندە گومرگییەکان بگرێتەوە.

 

- ڕوونیشیکردەوە "ئامانج ئەوەیە هەموو دەروازە گومرگییەکان بخەنە ناو سیستەمی ئەلیکترۆنی و دەست بکەن بە جێبەجێکردنی نوێترین شێوازەکانی گومرگیی کە پشت بە تەکنەلۆژیای مۆدێرن و زیرەکی دەستکرد و پەیوەندی ئەلیکترۆنی دەبەستن."

 

ئەوەی پێویستە بیزانیت: پەیوەست بە چاکسازی کارگێڕیی و دارایی،  ڕۆژی 31-12-2024، لە نووسینگەی سەرۆکوەزیرانی عێراق کۆبوونەوەیەک بە سەرۆکایەتی ڕاوێژکاری سەرۆکوەزیران بۆ کاروباری گومرگ و دەروازە سنووریەکان بەڕێوەچوو، لە کۆبوونەوەکەدا بڕیاریدا لە سەری ساڵەوە لە دەروازە سنوورییەکانی عێراق کار بە سیستمی ئەلیکترۆنی بکرێت.