دوایین زانیارییەکان پەیوەست بە ئاگربەستی غەززە

ئاڤا نیوز

دوای زیاتر لە 15 مانگ لە شەڕ، سەرئەنجام لە ژێر گوشاری ئەمریکا و بە نێوەندگریی قەتەر و میسر، ڕێککەوتنی ئاگربەستی غەززە و ئازادکردنی بارمتەکان ڕاگەیێنرا. 

 

وێنە گەورەکە: بڕیارە ڕێککەوتنەکە لە ڕۆژی یەکشەممە، 19-1-2025ـەوە بچێتە بواری جێبەجێکردنەوە، هەرچەندە هەندێک هەوڵیش هەن بۆ ئەوەی هەرچی زووترە جێبەجێ بکرێت. لەگەڵ ئەوەدا ئیسرائیل لە هێرش و کوشتار نەوەستاوە و لە دوای ڕاگەیاندنی ئاگربەستیشەوە لانیکەم 81 فەلەستینیی لە کەرتی غەززە کوشتوون و 188 کەسیش بریندار بوون. 

 

لەلایەکی دیکە: چاودێران ئاگربەستەکە بە لەرزۆک ناودەبەن، چونکە ئیسرائیل گوتویەتی، حەماس بە تەمایە ئەوپەڕی قازانج لە ئاگربەستەکە وەربگرێت، لەبەرامبەردا حەماس ئەمە ڕەتدەکاتەوە و دەڵێت بە تەواویی پێیەوە پابەندە. 

 

ئەوەی پێویستە بیزانیت: هێشتا کابینەی جەنگی ئیسرائیل بۆ پەسەندکردنی کۆتایی ئاگربەستەکە کۆنەبووەتەوە. بەڵام حەماس ئامادەکاریی تەواوی کردووە و بە گوێرەی زانیارییەکان لە یەکەم ڕۆژی ئاگربەستەکەدا سێ بارمتەی ژنی ئیسرائیلی ئازاد دەکات. 

 

کاردانەوەکان: وڵاتان پێشوازییان لە ڕێککەوتنەکە کردووە و داوایان کردووە هەرچی زووە یارمەتیی مرۆیی بگەیێنرێتە کەرتی غەززە و دەست بە خاوێنکردنەوە و ئاوەدانکردنەوەی کەرتەکە بکرێت.

 

ڕێککەوتنەکە بەم شێوەیە: هێشتا وردەکارییەکانی ڕێککەوتنەکە تەواو نەبوون و بڵاو نەکراونەتەوە، بەڵام ئاگربەست و کشانەوەی سوپای ئیسرائیل و بەردانی بارمتەکان لە خۆدەگرێت. هاوکات، هێشتا تیمەکانی دانوستاندن لە دەوحەوی پایتەختی قەتەرن بۆ ڕێککەوتنی تەواوەتیی لە سەر سەرجەم وردەکارییەکان.

 

کاریگەریی و لێکەوتەکان: حەماس هۆشداریی دەدات ئەگەر ئیسرائیل بەردەوام بێت لە هێرشەکانی ئەوا ژیانی بارمتەکانی دەخاتە مەترسییەوە و دەڵێت، هەر دەستدرێژیی و هێرشکردنێک لەم قۆناغەدا دەتوانێت ئازادیی بارمتەکان بگۆڕێت بۆ کارەسات.