ئیمارات كار لەسەر بەرهەمهێنانی كارەبا بە وزەی خۆر لە هەرێمی کوردستان دەكات

ئاڤا نیوز

بڕیارە كۆمپانیایەكی ئیماراتی لە هەرێمی كوردستان وەبەرهێنان لە كەرتی كارەبادا بكات و سوود لە وزەی خۆر وەربگرێت. بۆ ئەم مەبەستە لەگەڵ وەزارەتی كارەبای هەرێمی كوردستان گفتوگۆ کراوە.
 

وێنە گەورەکە: ئەمڕۆ پێنجشەممە 16-1-2025، کەمال محەممەد ساڵح، وەزیری کارەبای حکومەتی هەرێمی کوردستان لەگەڵ ناسر مەرزوقی، بەڕێوەبەری ڕێپێدراوی کۆمپانیای قابسەی ئیماراتی كۆ بووەتەوە كە بە وزەی خۆر كارەبا بەرهەم بهێنێت.

ڕاگەیێنراوی فەرمی: وەزارەتی كارەبای حكومەتی هەرێمی كوردستان ڕایگەیاند:

- بەڕێوەبەری جێبەجێكاریی كۆمپانیای قابسەی ئیماراتی ئامانجی سەردانەكەیان بۆ كوردستان ڕوون كردووەتەوە، كە بە نیازن لە بواری وەبەرهێنان لە كەرتی كارەبا بە وزەی خۆر لە هەرێمی كوردستان كار بكەن.

- وەزیری كارەبای حکومەتی هەرێمی کوردستان ئامادەیی وەزارەتی كارەبای بۆ ئەو مەبەستە دەربڕیوە بۆ هەموو كار ئاسانی و هاوكارییەك بۆ كۆمپانیای قابسەی ئیماراتی كە دەیەوێ لە كەرتی كارەبای هەرێمی كوردستاندا وەبەرهێنان بكات.

- ئاماژە بەوەشکراوە، هەلی وەبەرهێنان لە بەرهەمهێنانی کارەبا بە وزەی خۆر لە هەرێمی کوردستان کە کۆمپانیاکە لەڕووی ژینگە و تیشکی خۆر و کەمی خۆڵبارینەوە لێکۆڵینەوەی کردووە.

ئەوەی پێویستە بیزانیت: لە هەرێمی کوردستان خواست لەسەر بەرهەهێنانی کارەبا بە وزەی خۆر ڕوو لە زیاد بوونە بە تایبەتی لە گوندەکان و سەر زەوییە کشتوکاڵییەکان.