قۆناغی دووەمی دابەشکردنی زەوی دەستپێدەکات

 ئاڤا نیوز 

 

قۆناغی دووەمی دابەشکردنی زەوی دەستپێدەکات و ناوی 200 هه‌زار فه‌رمانبه‌ر بۆ وه‌رگرتنی زه‌وی ڕه‌وانه‌ی سه‌رۆكایه‌تیی ئه‌نجوومه‌نی وه‌زیران ده‌كرێت به‌مه‌به‌ستی په‌سه‌ندكردنیان. 

وێنە گەورەکە: پرۆسەی دابەشکردنی زەوی بەسەر فەرمانبەران و خانەنشینان لە هەرێمی کوردستان نەوەستاوە، هاوکات حکومەت دڵنیایی دەدات لەوەی هەر فەرمانبەرێک مەرجەکانی تێدابێت زەوی وەردەگرێت. 

 

لێدوانی فەرمی: سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤا میدیای ڕاگەیاند، فۆرمی 150 هه‌زار فه‌رمانبه‌ر به‌ نووسراوی فه‌رمی ڕه‌وانه‌ی سه‌رۆكایه‌تیی ئه‌نجوومه‌نی وه‌زیران کراوە به‌ مه‌به‌ستی په‌سه‌ندكردنیان. 

 

سەربەست مەولوود باسی لەوەشکرد، ئەمرۆ یان سبەی فۆرمی زیاتر لە 35 هەزار فەرمانبەری دیکە ڕەوانە دەکرێت و زۆربەی وەزارەتەکان لەخۆ دەگرێت، دوای وەرگرتنی ڕەزامەندی شارەوانییەکان دەتوانن دەست بە دابەشکردنی زەوییەکان بکەن. 

 

ئەوەی پێویستە بیزانیت: لە قۆناغی یەکەم زیاتر لە 15 هەزار پارچە زەوی دابەش کراوە، لە قۆناغی دووەمیش 200 هه‌زار کەس سوودمەند دەبن لە وەرگرتنی زەوی، ئێستا ئامادەکاریی دەکرێت بۆ وردبینی قۆناغی سێیەم.