پڕۆژە یاسا مشتومڕ ئامێزەکان دەخرێنەوە کارنامەی دانیشتنەکانی پەرلەمان

ئاڤا نیوز

جارێکی دیکە پڕۆژە یاسا مشتومڕ ئامێزەکان ئەوانەی پەیوەندیان بە هەرسێ پێکهاتەی کورد، سوننە و شیعەوە هەیە. دەخرێنەوە کارنامەی دانیشتنەکانی پەرلەمانی عێراق.

وێنە گەورەکە: سەرەڕای ئەوەی لە ڕابردوودا چەندین جار پرۆژەیاساکانی "باری کەسیی"،  "گەڕاندنەوەی خاوەندارێتیی موڵک و ماڵ بۆ خاوەنەکانیان" و  "یاسای لێبووردنی گشتیی" دەخرانە نێو کارنامەکانی دانیشتنی پەرلەمان، بەڵام بەهۆی ناکۆکیی نێوان لایەن سیاسییەکان و بایکۆتکردنی دانیشتنەکان، پەرلەمان نەیتوانیوە ئەو پرۆژە یاسایانە تێپەڕێنێت.

ڕاگەیێنراوی فەرمی: نووسینگەی پەرلەمانی عێراق کارنامەی دانیشتنی ڕۆژی سێشەممە 21-1-2025ی بڵاوکردەوە، بەگوێرەی کارنامەی دانیشتنەکە دەنگ لەسەر چوار پرۆژە یاساو خوێندنەوە بۆ دوو پێشنیازە یاسا و ڕاپۆرتی لیژنەی پەرلەمانی دەکرێت بەم شێوەیە:

 

 

 

- دەنگدان لەسەر پێشنیازە یاسای باری کەسیێتی ژمارە 188ی ساڵی 1959 

- دەنگدان لەسەر پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە.

- دەنگدان لەسەر پرۆژە یاسای هەمواری دووەمی یاسای لێبووردنی گشتیی ژمارە 27ی ساڵی 2016 

 

- دەنگدان لەسەر پرۆژە یاسای تەندروستی دەروونی.

 

- خوێندنەوەی یەکەم بۆ پێشنیازە یاسای سەندیکای وەرزشوانانی عێراقی.

 

- خوێندنەوەی دووەم بۆ پێشنیازە یاسای خوێندنی باڵا-ناحکومی.

 

- ڕاپۆرتی لیژنەی کاتیی پەرلەمانی بۆ بەدواداچوونی پاراستنی موڵک و ماڵی دەوڵەت.

 

 

ئەوەی پێویستە بیزانیت: پرۆژە یاسای هەمواری یاسای باری کەسیی، شیعە داوای پەسەندکردنی دەکات، پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە، کورد داوای پەسەندکردنی دەکات، هاوكات هەموارکردنەوەی یاسای لێبووردنی گشتیی ژمارە 27ی ساڵی 2016ـە، سوننە داوای پەسەندکردنی دەکات.