نوێترین زانیاریی لەبارەی ئەو خاوەن پێداویستییانەی کە ناویان تۆمار کراوە و مووچەیان بۆ نەبەستراوە

ئاڤا نیوز

 

هەمواری پڕۆژە یاسای بودجە وەک چارەسەرێک بۆ دابینکردن مووچەی خاوەن پێداویستییە تایبەتەکان دادەنرێت، لیژنەی هاوبەشی وەزارەتی کاری هەرێمی کوردستان و عێراق کار لەسەر جێگیرکردنی لە پشکی هەرێمی کوردستان دەکەن.

 

وێنە گەورەکە: لەماوەی ڕابردوودا شاندی باڵای وەزارەتی کار و کاروباری کۆمەڵایەتی چوونە بەغدا بەمەبەستی کۆبوونەوە و لێکتێگەیشتن، لەسەر ئەوە ڕێککەوتن کە لیژنەیەکی هاوبەش بۆ جێبەجێکردنی داواکارییەکان پێکبهێنن، لەیەکەم کاریاندا کار لەسەر ئەوە دەکەن مووچە بۆ نزیکەی 14 هەزار کەس جێگیر بکەن.

 

لێدوانی فەرمی: ئاریان ئەحمەد، وتەبێژی وەزارەتی کار و کاروباری کۆمەڵایەتی بە ئاڤای گوت، " کاری لەپێشینە بۆ جێگیرکردنی مووچەیە بۆ 13 هەزار و 200 خاوەن پێداویستی تایبەتی هەرێمی کوردستان کە ماوەی 12 ساڵە لیژنەیان بینیوە، ئێستا لیژنە هاوبەشەکەی نێوان هەولێر و بەغدا کار لەسەر جێگیرکردنی لە بودجەی 2025 دەکات."

 

زانیاریی زیاتر: بە گوتەی وتەبێژی وەزارەتی کاری هەرێمی کوردستان، تاوەکو ئێستا لە عێراق مووچەی خاوەن پێداویستییە تایبەتەکان زیاد نەکراوە، لە وەزارەتی دارایش کار لەسەر کەیسەکانیان نەکراوە، بەڵام هەوڵی لیژنە هاوبەشەکە بۆ هاوتاکردنی مووچەکانیان بەردەوامە.