لەبارەی چارەنووسی منداڵە ونبووەکانی هەڵەبجە شاندێک دەچێتە بەغدا

ئاڤا نیوز

 

بڕیارە  ئەمشەو وەزیری شەهیدان و ئەنفالکراوانی کوردستان لەسەر چارەنووسی منداڵە ونبووەکانی هەڵەبجە سەردانی بەغدا بکات.

چیرۆکی سەرەکی: لەكۆی 211 منداڵی ونبووی هەڵەبجە تەنیا 10 منداڵ دۆزراونەتەوەو بە خێزانەكانیان شادبوونەتەوە، تاوەکو ئێستا چارەنووسی 201 منداڵی دیکە دیار نییە.

لێدوانی فەرمی: عەبدوڵڵا حاجی مەحمود، وەزیری کاروباری شەهیدان و ئەنفالکراوان، بە ئاڤا میدیای ڕاگەیاند: ئەمشەو دەچینە بەغدا، هەروەها سبەی لەگەڵ باڵیۆزی ئێران، دامەزراوەی شەهیدانی عێراق، پزیشکی دادی عێراق کۆدەبینەوە.

ئەوەش خستەڕوو کە شاندەکە لە نوێنەرانی وەزارەتەکانی ناوخۆ، داد، فەرمانگەی پەیوەندییەکانی دەرەوە پێکهاتووە، ئامانج لە سەردانەکەمان خێراکردنی هەنگاوەکانی سۆراغکردنی منداڵە ونبوەکانی هەڵەبجەیە کە دوای ٣٦ ساڵ تەنیا ژمارەیەکی کەمیان دۆزراوەتەوە.